د امریکې سېنېټ د استخباراتي ادارې د مشرۍ دپاره د ټولسي ګېبرډ تقرري منظوره کړه

د امریکې سېنېټ د شورو، چهارشنبې، په ورځ د صدر ډانلډ ټرمپ په حکومت کې د ډرېکټر اف نېشنل اېنټېلېجنس عهدې دپاره د ټولسي ګېبرډ د تقررۍ منظوري ورکړه.

د ډرېکټر اف نېشنل اېنټېلېجنس په حېث به مېرمن ګېبرډ د سي ايي ای په شمول د امریکې د ۱۸ مختلفو استخباراتي مشري او سرپرستي کوي.

په سېنېټ کې د ګېبرډ د تقررۍ په حق کې ۵۲ او په مخالفت کې ۴۸ ووټونه ورکړی شوو.

د صدر ټرمپ د ريپبلېکن پارټۍ ځینو سېنېټرانو د ګېبرډ د تجربې او د هغې د ځینو فېصلو په اړه پوښتنې لرلې خو بیا د ابتدايي مخالفت نه تېر شول او د هغې د تقررۍ په حق کې يې رای ورکړې.

د هغې په مخالفت کې د ریپبلېکن پارټۍ یوازنی ووټ د کېنټکي ریاست سېنېټر مېچ مېکانل ورکړو.

په تېرو وختونو کې ګېبرډ ځینې داسې خبرې کړي چې د روس په حمایت کې ګڼل کېږي. د شام د خانه جنګۍ په مهال هغې د شام معزول صدر بشارالاسد سره ملاقات هم کړی و او د امریکې د حکومت راز افشا کوونکي اېډورډ سوډن حمایت يې هم کړی و.

ګېبرډ پخواني پوځي افسره ده، د هوايي ریاست څخه د ډېموکرېټېک پارټۍ غړې او په کال ۲۰۲۰ کې د صدارت خواهشمنده هم وه.

دي افس اف دي ډرېکټر اف نېشنل یا د استخباراتي ادارو د سرپرستۍ دفتر په امریکا د کال ۲۰۰۱ د ناین الېون حملو وروسته پس له دې قایم کړی شو چې د حملو په اړه تحقیقاتې رپورټ کې د استخباراتي معلوماتو ناکامي په ډاګه کړی شوه.

ټرمپ د نومبر په میاشت کې ګېبرډ د دې چوکۍ دپاره نامزد کړې وه او هغه يې زړه وره بللې وه.