د کرکټ د نړيوالې شورا د چېمپينز ټرافي لړۍ کې د افغانستان لوبډله نن د جمعې په ورځ د جنوبي افریقې سره مخامخ کيږي، دواړه لوبډلې په دې لړۍ کې لومړۍ لوبه کوي.
لوبه د پاکستان په کراچۍ ښار کې د ځايي وخت په دوه بجې او کابل په وخت ماسپښين يوه نیمه بجه پيليږي.
د افغانستان کرکټ لوبډلې مشر حشمت الله شهيدي د جنوبي افريقې سره لوبې په اړه ویلي، لوبډله هیڅ فشار نه لري، هر ډول تيارۍ يې نيولي دي، په وروستيو کې یې په شارجه کې جنوبي افريقې ته په درېو لوبو کې په دوو کې ماتې ورکړې وه.
تېر د ستمبر په میاشت کې په شارجه کې د افغانستان او جنوبي افريقې ترمنځ درې يو ورځنۍ سيالۍ شوې وې، دوه پکې افغانستان ګټلې وې.
شهيدي خبريالانو سره خبرو کې ويلي، لوبغاړي یې د پاکستان او اسيا په میدانونو کې لوبېدلي، ښه لوبه پکې کولی شي، په لوبډله کې ورسره غوره سپېنران دي، او دوی به کوشش کوي چې ښه بېټنګ وکړي.
افغان لوبډلې په کراچۍ کې د ننۍ لوبې نه وړاندې تمرينات کړي دي.
د پاکستان په کوربتوب د چېمپينز ټرافي لړۍ کې اته لوبډلې افغانستان، پاکستان، هند، اسټريليا، اينګلېنډ، جنوبي افريقه، نيوزي لېنډ او بنګله دېش برخه اخلي.
د چېمپينز ټرافي پيل شوو سيالو کې اته لوبډلې په دوه ګروپونو وېشل شوي دي.
ګروپ اې کې نيوزيلېنډ، پاکستان، بنګله دېش او هند شامل دي. ګروپ بي کې افغانستان، اسټريلیا، انګلېنډ او جنوبي افريقا لوبډلې اچول شوي دي.
د کرکټ پوهان په ګروپ بي کې د افغانستان لوبډله سيمې فاینل ته د رسېدو دپاره ښه لوبډله شماري، ځکه افغان لوبډلې سره ښه سپېران دي او پاکستان کې سپېنران ښه لوبه کولی شي.
د کرکټ پوهان وايي، بل اړخ ته جنوبي افريقه هم ښه لوبډله لري، داسې هم نه ده چې نننۍ لوبه به يو اړخيزه وي، دواړه به کلکه مقابله کوي.
د پاکستان په کوربتوب پيل شوې چېمپينز ټرافي لوبو کې پاکستان په لومړۍ لوبه کې د نيوزي لېنډ نه ماتې خوړلې او هندوستان تېره شپه په دوبۍ کې بنګله دېش ته ماتې ورکړې ده.
Forum