په افغانستان کې واکمنو طالبانو منلې، دوه برتانوي وګړي [ښځه خاوند]، يو امريکايي وګړي او ژباړونکی یې ورله نيولي دي.
د طالبانو د کورنيو چارو د وزارت وياند عبدالمتين قانع اې اېف پي ته ويلي، د ځینو تحفظاتو په بنياد یې چارواکو څلور تنه نیولي دي.
هغه ويلي، د برتانوي وګړو سره افغان اسناد شته، يو چينايي امریکايي وګړی او ژباړونکی یې نيول شوي، او د دوی د مسلې هوارولو دپاره هڅې روانې دي.
د مطبوعاتي رپورټونو ترمخه، 79 کلن پيټر رينولډز او مېرمن یې 75 کلنه باربي په لومړۍ فرورۍ باميان کې خپل کور ته د ستنېدو په وخت نيول شوي دي.
د برتانیې د بهرنيو چارو وزارت ويلي، د يادې کورنۍ ملاتړ کوي.
د اې پي خبري ادارې ترمخه، د برتانوي جوړې څلورو بچو ويلي، مور پلار یې د 18 کالو راهسې په افغانستان کې اوسيږي، او په 2021م کال کې د طالبانو په واک کې د راتلو وروسته هم دغلته پاتې شوي دي.
ويل شوي، دا جوړا په افغانستان کې د ري بيلډ يا بيا رغونې په نوم د تعليم اسانتياوې ورکوي، کاروبارونو، حکومتي او تعليمي ادارو او غېر دولتي ډلو ته د روزنې پروګرامونه راجوړوي.
د دوی يو بچي سارا اينتويسل ويلي، انګلېنډ دې په چېمپينز ټرافي کې پاکستان کې کېدونکې سيالۍ کې افغانستان د لوبېدو نه بايکاټ وکړي، چې په طالبانو فشار راشي او د دوی مور او پلار خوشي کړي.
هغې د برتانیې په کونسلګرۍ هم غږ کړی چې هر ډول مرسته یې وکړي.
قانع د نيول شوو کسانو په اړه ډېر تفصيل نه دی ويلی، او زیاته کړې یې ده نور معلومات به وروسته خپاره کړي.
د فرورۍ په 26مه په افغانستان کې واکمنو طالبانو د کېنېډا يو پځوانی پوځي د دوه مياشتو بند وروسته خوشی کړی، دغه خبر اې پي اېف خبري ادارې ورکړی وو چې د قطر په مينځګړيتوب دا کار ترسره شوی دی.
ويل شوي، ډېويډ لېوری تېر کال د نومبر په مياشت کې طالب چارواکو په کابل کې نيولی وو.
ويل کیږي اوس هم دوه امريکايان جورج ګلیزمن او محمود شاه حبیبي په افغانستان کې بندي دي.
د امریکې د بهرنیو چارو وزیر، مارکو روبیو د جنورۍ په 25مه خبرداری ورکړی که چري ثابته شي چې په افغانستان کې د طالبانو سره تر ښودل شوې شمېرې زیات امریکایي وګړي بندیان دي نو ددې ډلې د مشرانو په سر به تر اسامه هم "ډیر غټ انعام"وټاکل شي.
ښاغلي روبیو په ټولنیزه رسنۍ ایکس لیکلي وو ، هغه ته ویل شوي په افغانستان کې د طالبانو سره نور امریکایي وګړي هم بندیان دي.
د دې خبر معلومات د اې پي او اې اېف پي څخه اخستل شوي.
Forum