امنیتي سرچېنې وايي د خېبر پښتونخوا په ناکراره قبایلي ضلعه جنوبي وزیرستان کې یو مخور قبایلي مشر ملک عبدالخالق د نامعلومه وسله والو په برید کې وژل شوی دی.
د سیمې څخه یوې امنیتي سرچینې چې نه یې غوښتل نوم یې واخستل شي ، وي او اې ډیوه ته ویلي چې په ملک عبدالخالق دا برید د جمعې په ورځ د پوځي چاونۍ په سیمه کې د ایف سي کیمپ اؤ پولیس لاین تر څنګ شوی دی.
دغه سرچینې وویل چې نامعلومه وسله والو په ملک عبدالخالق ناتاره ډزې وکړې چې پکې هغه وړومبی سخت ژوبل شو اؤ په سمدستي توګه د علاج لپاره د وانا ضلعي روغتون ته ورسولی شو.
سرچینې وایي د وانا هسپتال نه وروسته ملک عبدالخالق په ژوبل حالت کې د ډيره اسماعیل خان ضلعي روغتون ته رسول کېدو چې په لاره یې د زخمونو توان رانه وړو اؤ ساه یې ورکړه.
پولیس وایي چې د پېښې له ځایه یې مهم شواهد ترلاسه کړي اؤ د پېښې پلټنې یې پېل کړي خو لا یې ددې پېښې په تړاؤ څوک نه دي نیولي.
سرچینې وایي چې ملک عبدالخالق په سیمه کې د امنیتي ځواکونو اؤ حکومتي چارواکو سره ښې اړیکې لرلې اؤ د پاکستان حکومت ورته صدارتي ایوارډ هم ورکړی ؤ.
په سمدستي توګه د ملک عبدالخالق د وژنې ذمه واري چا پغاړه نه ده اخستې خو تر دې وړاندې چې په قبایلي ضلعو کې په قامي مشرانو اؤ امنیتي ځواکونو څومره بریدونه شوي هغې کې د زیاترو ذمه واري تحریک طالبان پاکستان پغاړه اخستې ده.
Forum