صدر ټرمپ: د کابل هوايي مېدان کې د امریکايي ځواکونو په وژنه ککړ تن نیول شوی

د امریکا د کانګرس ګډې غونډې ته د خپلې دویمې دورې لومړۍ کلیزې وینا کې صدر ډانلډ ټرمپ ووېل چې د کابل هوايي مېدان کې د ۱۳ امریکایي ځواکونو په وژنه کې ککړ مهم تن نیول شوی دی.

صدر ټرمپ په دغه پېښه کې د ککړ تن د نیولو لپاره د پاکستان د حکومت مننه کړې ده.

نزدې درې نیم کاله پخوا د کابل په هوايي مېدان کې د ابي ګېټ (دروازې) خوا ته په ځانمرګي برید کې ۱۳ امریکایان وژل شوي وو. دغه پېښه د افغانستان نه د امریکايي ځواکونو د وتلو د بهیر په وخت، د ۲۰۲۱ د اګست په ۲۶مه شوې وه او د حملې پړه داعش ترهګرې ډلې منلې وه.

صدر ټرمپ ووېل چې نیول شوی تن امریکا ته په لار دی او زر به د امریکا عدالت ته مخامخ شي.

کانګرس ته په وینا کې ښاغلي ټرمپ د نیول شوي تن نامه ښودلې نه ده او نه یې د هغه د نیولو په اړه نور تفصیل ورکړی ده. نوموړي دا هم ویلي نه دي چې دغه تن کوم ځای نیول شوی دی.

صدر ټرمپ یو ځل بیا، لکه د خپل تېر شوي انتخابي کمپاین په شان، د افغانستان نه د امریکايي ځواکونو د ویستلو بهیر یو”شرمناک” کار وبالو. او تېر صدر جو بایډن یې د افغانستان نه د ”ویجاړونکې” انخلا لپاره زمه وار وبالو.

د ابي ګېټ پېښه د ۲۰۲۱ د اګست په ۲۶مه د افغانستان د پلازمېنې کابل حامد کرزي نړیوال هوایي ډګر مخې ته د یوې خونړۍ چاودنې په شکل کې شوې وه.

د مطبوعاتي رپورټونو له مخې په پېښه کې د ۱۳ امریکايي پوځیانو تر څنګ، لږ تر لږه ۱۸۰ افغانان وژل شوي او شاوخوا ۱۵۰ نور ژوبل شوي وو.

وژل شویو امریکايي سرتېرو کې دوه ښځینه پوځیانې هم شاملې وې.

د امریکا پخواني صدر جو بایډن د برید وروسته ویلي وؤ، چې دا برید به بې ځوابه پاتې نه شي. د پېښې په غبرګون کې، د امریکا پوځ د اګست ۲۷مه د افغانستان د ننګرهار ولایت په ډرون برید کې د داعش-خراسان دوه مشکوک غړي وژلي وؤ.
دا برید د افغانستان څخه د امریکایي ځواکونو د وتلو په مهال تر ټولو خونړۍ پېښه وه، چې د طالبانو لپاره هم لومړنۍ امنیتي ازموینه ګڼل کېده.