صدر ټرمپ د اوکراين دپاره د امریکې امداد ودرولی

سپينې ماڼۍ اعلان کړی، صدر ډانلډ ټرمپ د اوکراين دپاره د امريکې امداد ودرولی دی.

د امریکې د حکومت يو لوړ پوړي چارواکي د نوم نه ښکاره کولو په شرط وي او اې ته د ګل، دوشنبې په شپه کړي ايمېل کې ويلي، صدر ټرمپ د اوکراين په معامله ډاګيزه رای لري او توجه یې په امن ده.

چارواکي ويلي، اوکراين ته ورکړل کېدونکی امداد ودرولی شي او جاج اخستلی شي او يقيني کړل شي چې دا کار به مسلې په هواري کې مرستندويه وګرځي.

له دې وړاندې د ګل په ورځ صدر ټرمپ د اوکراين سره د قيمتي معدنياتو دپاره تړون، د امریکې د اوکراين د مرستو جاري ساتلو دپاره مهم ګرځولی او ويلي یې وو، د نهې، سه شنبې په ورځ به د کانګرس په ګډه غونډه کې اعلان کوي.

د ګل په ورځ د اوکراين صدر زيلنسکي ويلي وو، د امریکې سره د معدنياتو تړون کولو ته تيار دی او باور ولري چې د صدر ټرمپ سره اړيکې په ځای کولی شي.

زيلنسکي ويلي وو، "د اوکراين ناکامي يواځې د روس د صدر ولاديمير پيوټن کاميابي نه ده، دا د ټول يورپ ناکامي ده، دا د امریکې ناکامي ده، زما په آند، مونږ ټول په دې کې خوښي لرو چې پيوټن ته د ګټې موقع ور نه کړل شي".

تېره اوونۍ د اوکراين د صدر د واشنګټن د سفر په وخت د دواړو ملکونو ترمنځ د تړون امکان وو، خو د صدر ټرمپ او مرستيال صدر جی ډي وينس د زيلنسکي سره خبرې ورانې شوې وې.

صدر ټرمپ د اوکراين د جګړې په ختمولو ټينګار کوي، خو صدر زيلنسکي اندېښنې ښکاره کړې چې صدر ټرمپ په هغو شرطونو دا مسله هوارول غواړي کوم چې د کېيف په مقابله کې زيات د ماسکو په حق کې دي.

صدر ټرمپ د ګل په ورځ په ډاګه ويلي وو، که اوکراين خپله بقا غواړي نو زيلنسکي ته به تړون کول وي.

صدر ټرمپ ويلي وو، "دا کار ډېر زر کېدی شي، اوس ښيې يو تن دا تړون کول نه غواړي خو که يو تن دا کار تړون نه غواړي نو زما په فکر هغه ته ډېره موده نه شي پاتې کېدی، د هغه تن خبره به د ډېر وخت پورې وانه ورېدل شي، ځکه چې زه يقين لرم روس تړون کول غواړي، زه باور لرم د اوکراين خلک تړون کول غواړي هغوی د ټولو نه زيات په تکليف شوي دي".

له دې وړاندې صدر ټرمپ په ټولنيزو رسنيو د زيلنسکي دې اندازې ته، چې په اوکراين کې د روس د جګړې خاتمه "اوس هم لرې ده"، نيوکې کړې او دې ته یې "بد ترينه بیان" ويلي وو.

صدر ټرمپ ويلي، "امریکا به دا ډېر ونه زغمي".

د جمعې په ورځ سپينه ماڼۍ کې د صدر ټرمپ او زيلنسکي د ليدو او خبرو اړولو وروسته زيلنسکي د خپلو يورپي اتحاديانو سره هم ليدلي وو.

لندن کې په ليدنه کې د برتانيې وزيراعظم کېير سټارمر د امن پوځي دستو وړانديز تکرار کړی او د اوکراين دپاره یې د پينځه زره فضايي دفاعي ميزايلو دپاره د دوه اربه ډالرو اعلان کړی وو.

سټارمر پارلیمان ته په وينا کې ويلي وو، په ضرورت پېښېدو برتانيه مهم رول لوبولی شي.

هغه ويلي وو، دا سمه ده چې يورپ په خپله وچه، براعظم د امن ملاتړ دپاره دروند بار اوچتوي، خو د دې د کاميابۍ د هڅو دپاره د امریکا ملاتړ هم ترلاسه کول پکار دي.

دې خبر کې د کم لويس، او ځينې معلومات د اې پي، اې اېف پي او رویټرز څخه اخستل شوي