صدر ټرمپ د امید اظهار وکړو چې ایران سره د امن معاهده کېدلی شي

د امریکې صدر ډانلډ ټرمپ د جمعې په ورځ د دې امید اظهار وکړو چې ایران سره د امن معاهده کېدلی شي او د ایران په لړ کې به اینده څو ورځې دلچسپې وي.

د وايټ هاوس په اوول افس دفتر کې ټرمپ خبریالانو سره د خبرو اترو په مهال ایران سره د معاهدې په اړه د امید اظهار وکړو او ويې ويل ایران سره داسې صورتحال دی چې زر څه کېدلی شي.

د ایران سره د ممکنه معاهدې په اړه خبرو کې امریکايي صدر وویل اینده څو ورځې به دلچسپې وي.

صدر ټرمپ دا هم وویل دا "د دنیا په تاریخ کې دلچسپ وختونه دي."

په وایټ هاوس کې ایران سره د ممکنه معاهدې نه مخکې ټرمپ د امریکې فاکس برنس نیوز ټېلې وېژن سره مرکه کې وویل

ایران سره په اېټمي معاهده خبرې اترې کول غواړي او د ایران روحاني مشر علي خامنايي ته يې په دې لړ کې یو خط لېږلی دی.

د ملګرو ملتونو دپاره د ایران مشن ای اېف پي خبري ادارې ته وویل ایران د ټرمپ خط لا نه دی ترلاسه کړی.

د ایران خارجه وزیر عباس عرقچي ای اېف پي ته وویل ترڅو چې امریکا ایران د سخت دباو دلاندې ساتي او ایران ته د دړکې ورکوي. عرقچي د ټرمپ د خط په اړه په مستقیم ډول ای اېف پي ته جواب نه ورکولو.

د ایران سرکاري مطبوعاتو هم دغه خبر راوچت کړو خو د خامنايي دفتر په سمدستي ډول دا تصدیق نه دی کړی چې ایا د ټرمپ خط یې ترلاسه کړی دی او که نا؟

دا نه ده معلومه چې ۸۵ کلن خامنايي په د ټرمپ خط ته څه جواب ورکوي؟

په کال ۲۰۱۵ کې د ایران او د امریکې په شمول د ځینو نورو نړیوالو قوتونو ترمنځ د اېټمي معاهدې د لاس لیک کېدو نه مخکې به د امریکې پخواني صدر براک اوباما خامنايي سره خپل خط او کتابت خفیه ساتلو.

په کال ۲۰۱۸ ې ټرمپ امریکې د دغې معاهدې نه بهر کړه. هغه دغه معاهده خراب ترینه لوظنامه بللې ده.
ټرمپ په داسې حال کې خامنايي ته د خط لیکلو خبره کړې چې هغه او اسرایل دواړو لوظ کړی چې ایران به اېټمي وسله ترلاسه کولو نه ته پرېږدي.

که څه هم ایران دا خبره ردوي چې د اېټمي پروګرام هدف يې وسلې جوړول دي خو د یورینیم د صفا کولو عمل يې دوامداره ساتلی او ويل کېږي چې د یورینیم د صفايي کچه دې حد ته نږدې کړې چې په وسلو کې استعمالېدلی شي.

ټرمپ وویل امید کوي چې ایراني مشران به خبرو اترو ته تیار شي ځکه چې د هغه په قول پوځي اقدامات به خوفناک عمل وي.

د فاکس برنس نیوز سره د ټرمپ مرکه د زیارت، پنجشنبې، په ورځ ریکارډ شوي او د اتوار، یکشنبې، په ورځ به په مکمله توګه نشر کېږي. په مرکه کې هغه ویل خامنايي ته يې خط پرون لېږلی، چې ښښي دا به د شورو، چهارشنبې، ورځ وه.

وایټ هاوس د ټرمپ د خبرو تصدیق وکړو او ويې ويل هغه د ایران رهبرانو ته په اېټمي معاهده د مذاکراتو په تکل کې خط لیږلی دی.

ټرمپ وویل هغه به په معاهد مذاکرات کوي، دا یقین نه لري چې هرڅوک به ورسره اتفاق وکړي خو معاهده کولی شي او دا به د هغه په قول د پوځي فتح په شان ښه وي. هغه امکان څرګند کړو چې په دې لړ کې څه پرمختګ زر کېدلی شي.

امریکايي صدر امید څرګند کړو ایران به هم مذاکراتو ته تیار شي او دا به د ایران دپاره بهتره وي چې خط ترلاسه کړي. هغه وویل په متبادل صورت کې به امریکا څه نه څه ګام اخلي ځکه چې د هغه په قول ایران اېټمي وسلې ترلاسه کېدو نه نه شي پرېښودل کېدی.

ای اېف پي خبرې اداره وايي ایران ته د ټرمپ لاس رسی که نور څه نه وي نو لږ تر لږه په لهجه بدلون ښکاري ځکه چې د صدارت په وړمبۍ دوره ټرمپ د ایران په اړه سخت دریځ لرلو.

په وایټ هاوس کې خبریالانو سره خبرو اترو کې ټرمپ په یوکرېن کې د جنګ په اړه وویل چې دا شخړه او په دې کې کېدونکي خونرېزي ختمول غواړي.

ټرمپ ګیله وکړه چې په یوکرېن کې جنګ د ختمولو په لړ کې یوکرېن په مقابل کې د روس سره کار کول اسان ښکاري.

یوه هفته مخکې هم په اوویل افس دفتر کې د ټرمپ او د یوکرېن صدر ولادومېر زېلېنسکي ملاقات په تود ترخو خبرو اترو ختم شو او د توقعو برعکس صدرانو هغه معاهده لاس لیک نه شوه چې دلاندې په امریکا د یوکرېن نایابو معدنیاتو ته لاس رسی کولی شوي.

ټرمپ وویل که چېرې په یوکرېن کې جنګ ختم نه کړی شو نو دریم عالمي جنګ شروع کېدلی شي.

یادونه: د دې خبر ځینې معلومات د ای پي او د ای اېف پي خبري ادارو نه هم اخیستل شوي دي