ټرمپ د یو صدارتي فرمان په لاسلیک کولو سره انګرېزي د امریکې رسمي ژبه کړه

د امریکې صدر ډانلډ ټرمپ د شنبې- خالي په ورځ د یو صدارتي فرمان په لاسلیک کولو سره انګرېزي د امریکې رسمي ژبه کړه او دې اقدام یې په امریکا کې د نورو لسګونو ژبو په ویونکو د ممکنه اغېز په اړه د فعالینو او مدافع ډلو اندېښنه راپارولې ده.

تر دې مخکې د امریکې قانون جوړوونکو هلې ځلې کړې وې، چې انګرېزي د امریکې رسمي ژبه شي، خو دغو هڅو نتیجه نه وه ورکړې.

په دې فرمان کې راغلي چې "د رسمي ژبې په توګه د انګرېزي ټاکل یواځې اړیکې نه اسانه کوي، بلکې ګډ ملي ارزښتونه قوي کوي او یوه متحده او کارنده ټولنه ایجادوي".

ټرمپ په دغه فرمان سره د امریکې د پخواني صدر بل کلینټن د 2000م کال هغه فرمان هم منسوخ کړ، چې سرکاري ادارې او تنظیمونه یې مجبوره کول چې له انګرېزي پرته د نورو ژبو ویونکو ته د ژبې اسانتیاوې برابرې کړي.

خو بیا هم د ټرمپ نوی فرمان هغو ادارو او تنظیمونو ته چې د فیډرل حکومت بودیجه ترلاسه کوي، دا اجازه ورکوي چې غیر انګرېزي ویونکو ته د ژبې د اسانتیاوو برابرول روان وساتي.

په فرمان کې راغلي چې د نویو امریکایانو د هرکلي لپاره د ملي ژبې د زدکړې او هڅونې پروګرام به "امریکا په یو مشترک کور بدل کړي او نوي وګړي [شهریان] به خپلو امریکایي هيلو ته د رسېدو لپاره ځواکمن" کړي.

په فرمان کې ویل شوي "په انګرېزي ژبه خبرې کول نه یواځې له اقتصادي پلوه دروازې پرانیزي، بلکې له نوو راغلیو سره مرسته کوي چې په ټولنه کې ضم شي، په ملي مراسمو کې ګډون وکړي او زموږ ټولنې ته د خدمت سبب شي".

سپینه ماڼۍ وايي دا مهال په امریکا کې تر 350 پورې ژبې ویل کیږي، خو په فرمان کې ویل شوي چې انګرېزي په دغه هېواد کې "زموږ د جمهوریت د بنیاد" له وخته زموږ ژبه ده، او "د آیین او خپلواکۍ د اعلامیې په ګډون زموږ د ملت تاریخي اسناد په انګرېزي ژبه لیکل" شوي دي.

د امریکې د حکومتي شمېرو په بنیاد، له 2019م کال راهېسې تقریباً 68 میلین خلک په امریکا کې په خپلو کورونو کې په غیر انګرېزي ژبو خبرې کوي. اټکل کېږي په امریکا کې څه باندې 40 میلین خلک په سپېنش یا هسپانوي ژبه خبرې کوي.

د صدر ټرمپ د لوړې له مراسمو څو ساعته وروسته سپینې ماڼۍ له خپلې ویبپاڼې د هسپانوي ژبې برخه لرې کړه او هغه مهال یې ویلي وو چې د هسپانوۍ ژبې دا برخه به بېرته رغوي، خو د اتوار- یکشنبې تر ورځې لا هم نه ده پرانیستل شوې.

سپینې ماڼۍ سمدستي په دې اړه پوښتنې ته څه جواب ور نه کړ چې ایا د هسپانوي ژبې برخه به په ویبپاڼه کې بیرته خلاصه کړي که نه.

صدر ټرمپ په خپل اولني دور کې هم دا برخه بنده کړې وه، خو په 2021م کال کې د جوبایډن حکومت دا برخه بېرته پرانیستله.

په امریکا کې یوه ډله «یو ایس انګلش» د انګرېزي ژبې د رسمي کولو لپاره کوي او دا ډله وایي تر 30 زیاتو ایالتونو داسې قوانین منظور کړي دي چې انګرېزي ژبه د دوی رسمي ژبه وګرځوي.

یادونه:- د رپوټ معلومات له اې پي خبري ایجنسۍ اخیستل شوي دي.