په پاکستان کې د ملګرو ملتونو د کډوالې د ادارې (يو اېن اېچ سي ار) وياند قېصر افریدی وايي، د يخ موسم له کبله د پاکستان څخه افغانستان ته د کډوالو د لېږلو رضا کارانه عمل ودرول کيږي.
وي او ای ډيوه سره په خبرو کې افريدي وویل د تېرو کلونو په څېر به سږ کال هم د کال ډسمبر د لمړۍ نېټې نه تر فرورۍ ۲۸ پورې د کډوالو د بيرته لېږلو عمل ودرېدلی وي خو هغه زیاته کړه د دوی سره دلته کېدونکې مرستې او نورې اسانتیاوې به روانې وي.
د ملګرو ملتونو د کډوالو ادارې (يو اېن اېچ سي ار) ترمخه دا وخت په پاکستان کې رجسټرډ کډوال د ۱۴ لاکه پورې دي چې پکې په زياته شمېره کې کډوال په خېبرپښتونخوا صوبه کې اوسيږي.
یو اېن ایچ سي ار وویل سږ کال د پاکستان نه خواوشا پينځه نیم زره افغان کډوال بیرته خپل هېواد ته ستانه شوي او دا عمل چې د کال ۲۰۰۲ نه پېل شوی تراوسه پورې پکې ۴۴ کډوال بيرته افغانستان ته تللي دي.
راپورونه وايي د دې ترڅنګ نزدې اته لاکه نورو افغان کډوالو ته په پاکستان کې د پاتې کېدو کارډونه ورکړی شوي دي.
د پاکستان حکومت د روان کال جون په مياشت کې د رجسټرډ او کارډ لرونکو افغان کډوالو ته په ملک کې د پاتې کېدو موده تر يو کال پورې غځولې ده.
