د امریکې د کانګرس غړي د حکومتي لګښتونو پر قوانینو باندې د جوړجاړي په لټه کې دي

د امریکې صدر ډانلډ ټرمپ د چارشنبې- شورو په ورځ هغه اندېښنې ختم کړې چې ګواکې د مارچ له 14مې وروسته به فیډرل حکومت ته د ورکول کېدونکو پیسو په قانون کې د ټولنیز تحفظ د څانګو په پروګرامونو لکه مېډیکېډ او سوشل سیکیورټي کې هم لانجمن کموالی شامل وي.

صدر ټرمپ خبریالانو ته وویل، "موږ دې ته لاس نه وروړو، اوس موږ په درغلیو پسې ګرځو. زه ډاډه یم تاسو ورسره متفق یئ، لکه هغه خلک چې باید بهر [په ټولنه کې] نه وي، هغه خلک چې غیرقانوني بهرنيان او نور مجرمان دي".

د لګښتونو کمول یوه له هغو مسلو څخه ده چې د کانګرس غړي هڅه کوي د لنډمهاله لګښتونو د قانون تر ختتمېدو مخکې یې حل کړي چې یواځې دوې اوونۍ ورته پاته دي.

د استازو اېوان د سه شنبې- نهې په ورځ ناوخته د بودیجې قرارداد د 215 رایو په مقابل کې په 217 رایو هغه وخت منظور کړ چې د استازو اېوان سپیکر مایک جانسن د خپل ګوند د غړو کافي رایې ترلاسه کړې.

جانسن د سه شنبې- نهې په ورځ مخکې خبریالانو ته وویل، "موږ ژمنه وکړه چې د صدر [ډانلډ] ټرمپ بشپړه ایجنډا به تر سره کړو، دا نه چې یواځې د هغې یوه برخه، دا نه چې یواځې د هغې یوه وړه برخه به اوس وکړو او پاته به یې وروسته وکړو".

د استازو اېوان او سېنټ په قانوني مسودو باندې به اوس جوړجاړی کیږي او له هغه وروسته به دا په قانون باندې بدلیږي.

تر رایې ورکولو مخکې د استازو اېوان د کانفرنس یو شمېر ریپبلکن غړي لا هم د لګښتونو د اندازې په اړه اندیښمن وو، چې د 2017م د مالیاتو د کمولو وړاندیز شوې موده څنګه او کله وغزول شي او عملي شي او د امریکې د بودیجې خساره څنګه په داسې شکل کمه کړي چې د خلکو د خوندیتوب د هغو پروګرامونو کمولو ته اړتیا پېښه نه شي چې امریکایانو ته یې ګټه رسیږي.

د سېنټ مشرتابه په یوه جلا قانوني مسوده کې د مالیاتو د کمولو وړاندیز کړی چې ټاکل شوې ده د منظورۍ لپاره د دې کال په وروستیو کې وړاندې شي.

مایک جانسن وویل، "موږ نه یواځې د امریکایي مالیه ورکوونکو د پیسو د سپمولو او په سم ځای کې ددغو پیسو د لګولو لپاره کار کوو، چې موږ یې اخلاقي ذمه واري ګڼو، خو موږ دا اخلاقي ذمه واري هم لرو چې [د امریکا] پورونه کم کړو."

سېنټ د جمعې په ورځ د بودیجې د هغې قانوني مسودې منظوري ورکړه چې له مخې یې پوځ ته 150 ارب ډالر او د سرحدونو امنیت ته 175 ارب ډالر ځانګړي شوي دي. په دغه مسوده کې د بې وزله کورنیو لپاره د روغتیايي بیمې یا انشورنس مېډیکېډ د کمولو لانجمنه موضوع نه ده یاده شوې.

د استازو اېوان او سېنټ د دوو جلا مسودو له یو ځای کولو قانون جوړیږي. که دواړه اېوانونه د مارچ تر 14مې پورې په دې اړه نتیجې ته ونه رسیږي، کېدای شي د بودیجې د نشتوالي له کبله فیډرل حکومت په لنډمهاله توګه بند شي.

د سېنټ د بودیجې د کمېټې مشر لینډسي ګراهم د چارشنبې- شورو په ورځ په یوه بیان کې خبرداری ورکړ، "کله چې د سرحدي امنیت خبره راځي، وخت ډېر مهم دی. ای سي اي [د ایمیګرېشن او کسټمز اداره] به په میاشتو کې نه په اونیو کې پیسې ختم کړي. د صدر ټرمپ د سرحدي امنیت ایجنډا بندول نه یواځې بد سیاست دی، بلکې خطرناک هم دی."

ټرمپ تیره اونۍ پر خپل «ټروت سوشل» ټولنیزه رسنۍ باندې په پوسټ کې ولیکل، "اېوان او سېنټ د یو متحد او نه ماتېدونکي ټیم په توګه په ګډه ځانګړی کار کوي، خو د لینزي ګراهم د وړاندې شوې مسودې پر ځای چې ورباندې خبرې کیږي، د استازو اېوان مسوده امریکې ته د لومړیتوب ورکولو لپاره زما تګلاره څه ناڅه نه بلکې په بشپړ ډول عملي کوي."

د سېنټ د اقلیت مشر چک شومر ووټ ورکول رایې ورکوونکو ته د زیان رسېدو په لور لومړی ګام وباله، "تېره شپه، تقریباً هر یو د استازو اېوان ریپبلکن خپل نومونه لاسلیک کړل چې د امریکې په تاریخ کې به د مېډیکېډ [د لګښت] تر ټولو لوی کمی وي".

چک شومر دا د "ناورین" په توګه یاد کړ او ویې ویل چې زیان به یې لسګونه میلینه امریکایي کورنیو ته ورسیږي، د ده په وینا کله چې د مېډیکېډ خبره راځي تقریبا بې مثاله وي".