امریکايي او روسي چارواکي په ماسکو کې په یوکرېن کې د ډزبندۍ په اړه خبرې اترې کوي

د امریکې او د روس چارواکي به د روس سرښار ماسکو کې ملاقات او په یوکرېن کې د ۳۰ ورځو د اوربند په موضوع مذاکرات کوي.

د روسي حکومت کرېملېن ترجمان د زیارت، پنجشنبې، په ورځ وویل امریکايي مرکچیان روس ته په لاره دي. د دې نه مخکې، وایټ هاوس د شورو، چهارشنبې، په ورځ وویل خصوصي استازی سټیو وېټکوف به د خبرو اترو دپاره ماسکو ته ورځي.

د امریکې صدر ډانلډ ټرمپ د شورو، چهارشنبې، په ورځ د وايټ هاوس په اوول افس نومې خپل دفتر کې خبریالانو ته وویل دا اوس چې "مونږ خبرو کوو" روس ته "خلک روان شوي دي" او امید دی چې "د روس نه ډز بندي ترلاسه کولی شوو."

د وایټ هاوس ترجمانې کېرولاین لېوېټ فاکس نیوز ته وویل د امریکې د قومي سلامتیا مشیر مایک والټز د شورو، چهارشنبې، په ورځ د روس خپل هم منصب سره خبرې اترې کړي دي.

دا هفته د امریکې او د یوکرېن چارواکي د سعودي عرب په ساحلي ښار جده کې یوځای شوي وو او د ملاقات وروسته په مشترکه اعلامیه کې وویل شوو چې یوکرېن د ۳۰ ورځو د ډزبندۍ په اړه د امریکې تجویز منلی دی.

د یوکرېن صدر ولادومېر زېلېنسکي د شورو، چهارشنبې، په ورځ د امریکې د کوښښونو ستاینه وکړه او ويې ويل یوکرېن د امریکې د تجویز سره سم د ۳۰ ورځو ډزبندۍ ته تیار دی.

زېلېنسکي وویل په جنګ کې عارضي وقفه د امن دپاره د پراخه معاهدې دپاره استعمالېدلی شي. په یوکرېن کې جنګ په کال ۲۰۲۲ کې په هېواد د روس د یرغل نه شروع شوی دی.

یادونه: د دې خبر ځینې معلومات د ای پي، ای اېف پي او د روېټرز خبري ادارې نه اخیستل شوي دي