وېټیکن وایي د پوپ فرانسیس روغتیایي حالت خراب شوی دی

وېټیکن وویل د نړۍ د کېتولیکو عیسایانو د مشر پوپ فرانسیس روغتیایي حالت په تېرو 24 ساعتونو کې خراب شوی او زیاتوي چې هغه د "دمې په څېر د ساه اخیستو په تکلیف" اخته دی او له چټک آکسیجن سره سره وینې ته هم اړتیا لري.

وېټکن د شنبې- خالي په ورځ په خپل یو بیان کې وویل، "مقدس پلار په هوش کې پاتې شوی او ورځ یې په څوکۍ کې تېره کړې ده، که څه هم هغه تر پرون ډېر په تکلیف وو. د هغه حالت تر څارنې لاندې دی".

وېټیکن وایي88 کلن فرانسیس له یوې اونۍ راهیسې د سږو په پېچلې ناروغۍ اخته شوی او په روغتون کې بستر دی، وایي کله یې چې په معانیاتو کې د وینې له کمښت سره تړلې ناروغۍ انیمیا نخښې را برسېره شوې وینه هم ورته ولګول شوه:

تر دې مخکې ډاکټرانو وویل فرانسیس د سکاروي یا نمونیا او د سالنډۍ په پېچلې ناروغۍ اخته شوی چې وايي چې لا هم له ناڅرګند حالت سره مخ دی ځکه نو هغه به لږ تر لږه یوه بله اونۍ هم په روغتون کې وساتي.

وېټیکن د شنبې- خالي په ورځ له ناروغه پوپ پرته د خپل مقدس کال د جشنونو مراسم تر سره کړل.

د شنبې- خالي په ورځ په مخکینیو تازه خو لنډو معلومات کې وېټیکن وویل چې فرانسیس تېره شپه ښه خوب وکړ.

خو ډاکټرانو خبرداری ورکړی چې پوپ فرانسیس ته ور پېښ تر ټولو لوی خطر د سېپسس ناروغۍ پیل به وي، چې وایي‌ د وینې سنګینه ناروغي ده او هغه وخت پېښېږي چې سکاروی پېچلي حالت ته ورسیږي.

د پوپ طبي ټیم د پوپ د حالت په اړه په خپلو اولنیو تفصیل تازه معلوماتو کې وویل، د جمعې تر ورځې پورې د سیپسس ناروغۍ هیڅ ثبوت نه وو او فرانسس په هغو مختلفو دوایانو باندې غبرګون ښودلی وو چې هغه خوړلې.

د پوپ شخصي علاج کوونکي ډاکټر لوګي کاربون وویل، "هغه له خطرې بهر نه دی."

فرانسس له اوږدې مودې راهیسې د سږو یا پړپوس ناروغي لري او د فرورۍ په 14مه د سرې غاړې یا د سږو د نلونو په ناروغۍ برونکایټس باندې له اخته کېدو یوه اونۍ وروسته په جیمیلي روغتون کې داخل کړی شو.

ډاکټرانو یې اول د وایرس، بېکټریا او د ساه اخیستو د لارې د فنګسي پېچلې ناروغۍ او بیا په دواړو سږو کې د نمونیا د پیلېدو تشخیص وکړ. دوی ورته د "مکمل آرام" او دوایانو خوړلو وړاندیز وکړ او د اړتیا په وخت کې یې ورته د اضافي اکسیجن لګول هم وویل.

د روم د جمیلي روغتون د دوایانو او جراحۍ د څانګې مشر ډاکټر سرجیو الفیري وویل، فرانسس ته ور پېښ تر ټولو لوی خطر دا وو چې دا وخت د هغه د ساه اخیستو په سیسټم کې ځینې جراثیم دي او هغه د وینې جریان ته داخلېږي چې د سیپسس ناروغۍ سبب کیږي. وایي سیپسس د غړو د کار پرېښودو او مړینې سبب جوړېدای شي.

د شنبې- خالي په ورځ د روم د جیمیلي روغتون مخې ته د نړۍ له ګوټ ګوټه د کېتولیکو عیسویانو په لسګونو مشران ورټول شوي وو او د پوپ د ښه کېدو لپاره یې دعاوې کولې. د دعا دا مراسم راهبو خویندو ترتیب کړي وو.

په دوی کې یوه له چیلي څخه ورغلې راهبه سبرینا دیلبوکوېرک وه، هغې اې پي خبري ایجنسۍ ته وویل "موږ هیله لرو چې پوپ فرانسس بېرته روغ شي او زموږ د کلیسا اداره پر مخ بوځي".

پوپ فرانسس دا وخت 88 کلن دی او له 2013م کال راهیسې د نړۍ د څه باندې یو ارب او درې سوه میلینه کېتولیک عیسایانو مذهبي‌ مشر دی چې د ډېر زیات سفارتي، کلتوري او مذهبي اغېز په خاطر د نړۍ په ډېرو ځواکمنو شخصیتونو کې ګڼل کیږي.