د عوامي نيشنل ګوند د خېبرپښتونخوا مشر امیرحېدر خان هوتي سره ټولې شتمنۍ د ۵۱ کروړه ۳۷ لاکه روپو دي، د مردان نه د قامي اسمبلۍ په حلقه اېن ای ۲۱ باندې د نوموړي په مقابله کې د پاکستان تحريک انصاف عاطف خان د دوه کروړه او ۷۷ لاکه روپو شتمنۍ لري.
امير حېدر خان هوتي د کال ۲۰۰۸م نه تر ۲۰۱۳م پورې د خېبرپښتونخوا صوبې اعلا وزير پاتې شوی او عاطف خان د پاکستان تحريک انصاف په تېر حکومت کې د تعليم وزير ؤ.
د حېدر هوتي په شتمنيو کې د اووه نيم کروړه روپو يو کور، د هغه په نوم د ۴۲ کروړه او ۲۰لاکه روپو د کرکيلي ځمکه ده.
د نوموړي د مېرمن ټول جايداد او شتمنۍ د ۵۲ کروړه او ۸۲ لاکه روپو دي.
هوتي په دوه سي اېن جي سټېشنو کې برخه لري او دوه کرولا ګاډي لري چې ۴۲ لاکه روپۍ قيمت لري. د هغه سره ۱۲۰ تولې سره زر دي.
د نوموړی په بېنک کې په خپل نوم لاس لاکه ۲۳ زره روپۍ او د مېرمن په نوم يې ۸۴ لاکه او ۱۸ زره روپۍ دي.
په هغه باندې هيڅ قسمه قرضې نشته او په کفالت کې يې ښځه، دوه زامن او يوه لُور ده.
د هغه په کال ۲۰۱۷م کې امدن ۱۹ لاکه ۸۰ زره او ټېکس يې يو لاک ۴۸ زره روپۍ، او يولاک ۸۰ زره روپۍ ټېکس يې د کرکيلي په امدن جمع کړی دی.
بل لور ته د عاطف خان سره د دوه کروړه ، ۷۷ لاکه روپو ټولې شمتنۍ دي چې پکې ۶۹ کناله ځمکه لري.
نوموړی د ۴۲ لاکه روپو د دوايانو په کمپنۍ کې برخه لري، او هغه په بېنک يو نيم کروړ روپۍ او د ۱۳ لاکه روپو دوه ګاډي لري هغه سره د دوه نيم لاکه روپو فرنېچر او ۲۵ لاکه ۳۹ پرې قرض دي.
عاطف خان په کال ۲۰۱۷م کې ۴۹ لاکه ۸۳ زره روپۍ د تنخواه د لارې امدن ترلاسه کړی او شپږ لاکه ۶۴ زره روپۍ ټېکس یې جمع کړی دی.
په ياده حلقه د متحده مجلس عمل (اېم اېم ای) مولانا شجاع الملک هم کانديد دی. د هغه په شتمنيو کې د دوه کروړه روپو ګډ جايداد او د لس نيم لاکه روپو ګاډی لري. د هغه سره د پينځه لاکه روپو سره زر دي.
د مردان نه د قامي اسمبلۍ په حلقه اېن ای ۲۱ باندې په راتلونکو عامو انتخاباتو کې د حېدر هوتي، عاطف خان او شجاع الملک سره ټول شپږ کانديدان په مېدان کې دي.