واشنګټن ډي سي ـــ په افغانستان کې د سولې او پخلاینې لپاره د امریکې ځانګړي استازي زلمي خلیلزاد د عربي اماراتو په کوربتوب په ابوظبۍ ښار کې د طالبانو او افغان حکومت له پلاوي سره تر خبرو وروسته نن په اسلام اباد کې له پاکستاني چارواکو سره لیدلي او هغوی ته یې د دغو خبرو په اړه معلومات ورکړي دي.
خلیلزاد پر خپله ټویټر پاڼه لیکلي: "له پاکستاني مشرانو سره مې ولیدل چې هغوی ته په عربي اماراتو کې زموږ د ناستو په اړه معلومات ورکړم. نن شپه به په کابل کې له افغان مشرانو سره هم په دې اړه ناستې ولرم".
Just met w #Pakistan leaders to update them on the state of play following our meetings in UAE. Looking forward to meeting Afghan leaders in Kabul, #Afghanistan tonight.
— U.S. Special Representative Zalmay Khalilzad (@US4AfghanPeace) December 19, 2018
د وام په نوم د اماراتو سرکاري خبري ایجنسۍ لیکلي، چې د امریکا او طالبانو تر منځ د تېرو دوو ورځو په خبرو کې د طالبانو د پلاوي په ګډون د سعودي عربستان او پاکستان استازو هم ګډون کړی وي. وام دغه غونډه ګټورې ارزولې او لیکي چې د ټولو اړخونو لپاره به مثبتې نتیجې ولري.
زلمي خلیلزاد پخپله هم دغه خبرې ګټورې ګڼلې دي او د دې غونډې په کوربتوب یې د عربي اماراتو ستاینه کړې ده:
"په عربي اماراتو کې مو له افغان او نړیوالو ګډونوالو سره په دې مقصد ګټورې ناستې وشوې چې په افغانستان کې د جګړې د پای ته رسېدو لپاره د افغانانو تر منځ مذاکراتو ته لاره هواره شي".
Had productive mtgs in UAE w Afghan & intl partners to promote intra-Afghan dialogue towards ending the conflict in #Afghanistan. Grateful to UAE for hosting talks & their commitment to founder’s legacy as Year of Zayed ends & Year of Tolerance begins: https://t.co/7lNaAeErqh
— U.S. Special Representative Zalmay Khalilzad (@US4AfghanPeace) December 19, 2018
زلمي خلیلزاد په اسلام اباد کې د پاکستاني پوځ له مشر جنرل قمر جاوید باجوه سره هم لیدلي دي. د پوځ ویاند آصف غفور پر ټویټر لیکلي چې باجوه او خلیلزاد د سیمې د امنیت، د افغان سولې د بهیر او په هغه کې د پاکستان پر هڅو خبرې کړې دي:
"خلیلزاد د افغان سولې په بهیر کې د پاکستان هڅې وستایلې او د پوځ مشر هم په ټینګار سره وویل چې په افغانستان کې امن د پاکستان لپاره مهم دی او هغه ته یې باور ورکړ چې په سیمه کې د امن او ارامۍ لپاره به خپلو هلو ځلو ته دوام ورکوي".
H.E Mr Zalmay Khalilzad called on COAS. Regional security and Afg peace process discussed. Visiting dignitary appreciated Pak’s efforts for Afg peace process. COAS reiterated that peace in Afg is imp for Pak and assured cont efforts for bringing peace and stability in the region. pic.twitter.com/GlMWpfm1cJ
— Maj Gen Asif Ghafoor (@OfficialDGISPR) December 19, 2018
طالبانو هم په یوه خبرپاڼه کې ویلي، چې له امریکایي استازو سره په لیدنه کې یې د خبرو تمرکز له افغانستانه د بهرنیو ځواکونو پر ایستلو وو، خو ورسره یې په افغانستان کې له طالب بندیانو سره د ښه چلند او د هغوی د خوشي کېدو غوښتنه هم کړې ده. طالب ویاند ذبیح الله مجاهد په خبرپاڼه کې ویلي، چې د ابوظبۍ په غونډه کې پر اوربند، لنډمهالي حکومت، انتخاباتو او له افغان حکومت سره پر مذاکراتو خبرې نه دي شوې.
د کابل او اسلام اباد حکومتونو تر اوسه په رسمي توګه د امریکا او طالبانو د وروستیو خبرو په اړه څه نه دي ویلي، خو په افغانستان او پاکستان کې سیاسي څېړونکي د قطر او ابوظبۍ وروستۍ ناستې د افغان سولې لپاره ګټورې ګڼي.
زلمی خلیلزاد چې د افغان سولې لپاره د امریکې د ځانګړي استازي په توګه ټاکل شوی تر اوسه یې له طالبانو سره په قطر او ابوظبۍ کې درې ځله ناستې شوې دي او تمه ده چې راتلونکې ناسته به د سعودي عربستان په پایتخت ریاض کې وي خو نېټه یې نه ده ټاکل شوې.