واشنګټن ــــ د هند او پاکستان تر منځ روانې شخړې او جګړې ته پښتنو ټولنیزو فعالانو، سیاستوالو، شاعرانو او د ژوند له نورو برخو سره تړلو کسان هم غبرګون څرګند کړی او اکثرو یې جګړه د دغو دواړو هېوادونو په تاوان بللې ده.
د شمالي وزیرستان ځوانانو پر ټولنیزو رسنیو د خپلو ړنګو کورونو او د شلو-ګوډو خلکو او ماشومانو عکسونه ورکړي او ویلي یې دي چې که څوک جګړه غواړي نو له دوی دې پوښتنه وکړي. د پښتون ژغورنې غورځنګ یوه فعال عبدالله ننګیالي پر ټویټر لیکلي:
"جګړه د تباهۍ او وینو تویولو نوم دی او امن د مینې او انسانیت نوم دی". ننګیال په یوه بل ټویټ کې دا شعر لیکلی: "تاسو جنګ ته ډېر خوشال یئ بیا به ژاړئ: که مو وکتل زمونږ ړنګ بازارونه او کورونه".
War is the name of destruction & bloodshed while peace is the name of love & humanity!#PTMStands4Humanity#PashtunsStand4Peace #SayNoToWar
— Abdullah Nangyal (@a_baittani) February 27, 2019
د پښتون ژغورنې غورځنګ یوه مخکښ او د پاکستان د قومي اسمبلۍ غړي محسن داوړ جګړه د تباهۍ نسخه بللې او ویلي یې دي چې دوی [د شمالي وزیرستان خلکو] د جګړې دا تباهي لیدلې ده. محسن داوړ پر ټویټر لیکلي:
"په اېټمي ځواک سمباله د نړۍ زیاته برخه ابادي لرونکې جنوبي اېشیا بصیرت لرونکي مشرتابه ته اړتیا لري. دواړو هېوادونو ته په کار دی چې په کلکه اراده د ترهګرۍ د ختمولو او د خپلو اوږدمهاله ستونځو د حل لپاره تر خپل منځ تاوتریخوالی ختم کړي".
War is recipe for disaster. We have been through that.Nuclear armed South Asia inhibited by large part of global population deserves visionary leadership.Deescaltion wd a commitment for eradication of terrorism & resolution of outstanding issues is the way out for both countries.
— Mohsin Dawar (@mjdawar) February 27, 2019
پخواني سنېټر او سیاستوال افراسیاب خټک غوښتنه کړې، چې هند او پاکستان دواړه باید مخکې له دې چې تر منځ پېښه شوې وسلواله شخړه یې پسې و غزېږي او تم کول یې ګران شي، باید مخنیوی یې وکړي. افراسیاب خټک پر ټویټر لیکلي:
"توندروه ډلو د دواړو هېوادونو تر منځ پر هغه مثبته فضا برید وکړ، چې د کرتارپور دروازې د جوړولو په نتیجه کې را منځته شوې وه. دواړو هېوادونو ته پکار دی چې د وسلوالو په ضد ګام واخلي".
Both Pakistan & India should arrest the present armed escalation before it becomes irreversible. Extremists have attacked the positive atmosphere between the 2 countries after agreement on Kartarpura Corridor. The states need to take the initiative back from “non state actors”.
— Afrasiab Khattak (@a_siab) February 26, 2019
د عوامي نېشنل ګوند مشر اسفندیار ولي خان پر ټویټر پخپلو پرله پسې څو پیغامونو کې له هند او پاکستانه غوښتي، چې د شخړې پر ځای خپلې ستونځې د خبرو اترو له لارې حل کړي. اسفندیار ویلي ګوند یې د عدمِ تشدد پلوی دی ځکه نو د دواړو غاړو د تشدد خلاف دی:
"پارلمان اعلی اداره ده او پارلمان باید په دې حساس وخت کې خپل کردار تر سره کړي، که له تباهي وروسته مذاکرات کېږي نو تر بربادۍ مخکې خبرې کول هم څه بده خبره نه ده، هېواد په حساس حالت کې دی او دواړه هېوادونه باید د جذبې پر ځای له عقل او هوشه کار واخلي، جګړه د کومې شخړې حل نه دی".
پارلیمنٹ سپریم ہے اور پارلیمنٹ کو اس نازک وقت میں اپنا کردار ادا کرنا چاہئے،اگر تباہی کے بعد مذاکرات کرنا ہیں تو بربادی سے قبل بات چیت میں کوئی مضائقہ نہیں،ملک نازک دوراہے پر کھڑا ہے اور دونوں ملکوں کو جوش کی بجائے عقل اور ہوش سے کام لینا چاہئے ، جنگ کسی مسئلے کا حل نہیں https://t.co/vHAaA55ui9
— Asfandyar Wali Khan (@AsfandyarKWali) February 26, 2019
د تعلیم او د ښځو د حقونو مبارز او د ملالې یوسفزۍ پلار ضیاء الدین یوسفزي پر ټویټر لیکلي، چې د دوو اېټمي ځواکونو هند او پاکستان تر منځ هر ډول جګړه به په دواړو هېوادونو کې پر میلینونو انسانانو قیامت را ولي. ضیا الدین یوسفزي د جګړې په ضد په ویډیو کې خپل یو اوږد نظم هم وړاندې کړی چې ځینې مسرې یې داسې دي:
"جنګ فتنه ده وسوسه ده، جنګ د کرکې نتیجه ده: د خپل سیوري نه به تښتې، جنګ د ویرې اندېښنه ده: په رڼا پسې به ړوند شې، جنګ یو تکه توره شپه ده: جنګ هیڅ حل د شخړو نه دی، جنګ پخپله مسئله ده: د انسان په وینو پایي، جنګ هغه توره بلا ده".
پر ټولنیزو رسنیو ډېرو پښتنو بیا د پاکستان د نورو خلکو غوندې د جنګ په پلوۍ ویلي، چې په جګړه کې د پاکستاني پوځ تر څنګ درېږي او ځینو یې په خپلو ویډیویي پیغامونو کې هم هند ته ګواښونه کړي، چې هغوی ته خلکو د صاحب شاه صابر په دې بیت ځواب ویلی:
د سرو لمبو د غرغرو له شوره نه دي خبر
دا څوک چې جنګ غواړي د جنګ له زوره نه دي خبر