د وزيرستان نه د قامي اسمبلۍ غړو او پښتون ژغورنې غورځنګ مخکښ مشرانو علي وزير او محسن داوړ په دوه مقدمو کې په ضمانت د خوشي کېدو دپاره په خواستونو اورېدنه وشوه، او عدالت ورته په يوه مقدمه کې د ضمانت منظوري ورکړه او بل خواست يې رد کړو.
د دوي دواړو وکيلانو وي او ای ډيوه سره په خبرو کې د بنو د ترهګرۍ د مخنيوي په عدالت کې د اورېدنې وروسته د عدالتي فېصلې حال شريک کړو.
په مقدمه کې د دواړو وکيل طارق افغان وويل د اووم جون په پوځي ګاډي د چاؤدنې په مقدمه کې عدالت ضمانت منظور کړو او د خړ کمر د مقدمې ضمانت يې منظور نه کړو.
هغه وويل دوي به اوس د خړکمر په مقدمه کې د ضمانت دپاره هايکورټ ته خواست کوي.
په يادو مقدمو کې د پېښور هايکورټ د وکيلانو مشر لطيف افريدی هم وکالت کوي.
هغه وويل دوي ته د وړاندې نه اندازه وه چې عدالت به په يوه مقدمه کې خواست منظوروي او په بله کې به یې ردوي.
د نوموړي په وېنا د خړکمر په مقدمه کې د پاکستان استخباراتي اداره (ايي اېس ايي) مدعي ده د هغې دباؤ فشار دی ځکه دوي پارلیمان ته هم نه وړاندې کيږي.
هغه وويل اوس به هايکورټ ته ځي ځکه چې د نوموړي په وېنا واړه عدالتونه فشار نه شي زغملی.
لطيف افريدي زياته کړه دوي د هايکورټ نه تمه لري چې علي وزير او محسن داوړ ته به د خړکمر په مقدمه کې ضمانت ورکړي.
محسن داوړ او علي وزیر په ۲۶مې د شمالي وزیرستان په خړ کمر سيمه کې په پوځي چيک پوسته د بريد او بيا د جون په اوومه نېټه د پوځ په ګاډي د چاؤدنې په تورنو مقدمو کې بندیوان دي او د پاکستان حکومت په دوي باندې د رياست مخالفه کارروايانو کې د ککړتيا او ترهګرۍ مقدمې درج کړي دي.