د افغانستان د دفاع وزارت وايي هغه عملیات چې د پوځ لخوا په تیرو ۲۴ ساعتونو کې د هېواد په ۱۷ ولایتونو کې ترسره شوي پکې ۶۶ تنه وسله وال طالبان وژل شوي او ۲۹ نور ټپيان شوي دي.
د دفاع د وزارت ویاند مرستیال زبېر عارف وي او ای ډيوه سره په خبرو کې نن د ګل، دوشنبې په ورځ وویل په دې هوايي او ځمکنیو عملیاتو کې افغان پوځ ته مرګ ژوبله نه ده رسېدلې.
عارف وايي د افغان پوځ لخوا دا پلان شوي عملیات په سرپل غور، بغلان، هلمند، هرات او د غزني په ګډون د افغانستان په ۱۷ ولایتونو کې ترسره شوي دي.
هغه وايي د هرات ولایت لپاره د طالبانو نظامي کمیسیون مشر چې په نبي جان مشهور و په وژل شویو کسانو کې شامل دی.
د دفاع وزارت وايي هغه تازه هوايي برید چې د افغان پوځ لخوا نن له غرمې مخکې په غور ولایت کې ترسره شوی له امله یې ۱۶ وسله وال وژل شوي خو تراوسه د وژل شویو کسانو د هویت په اړه معلومات نشته.
د یو بل خبر له مخې د جوزجان ولایت سیمه ییز چارواکي وايي د دې ولایت فیض باد ولسوالۍ په حېدر اباد سیمه کې د افغان امنیتي ځواکونو په امنیتي پوستو د طالبانو لخوا د شوي برید په پایله کې ۱۴ تنه افغان سرتیري وژل شوي دي او ۵ نور ټپيان شوي دي.
د جوزجان د والي ویاند عبدالمعروف اذر د دې خبرې د پخلي ترڅنګ ویلي چې د طالبانو دا برید تیره شپه درې نیمې بجې ترسره کړی دی.
د نوموړي په وېنا په د افغان پوځ په متقابله جګړه کې اووه تنه وسله وال طالبان هم وژل شوي او درې تنه نور يې ټپیان شوي دي.
خو د دفاع وزارت ویاند مرستیال زبېر عارف د جوزجان فیض اباد ولسوالۍ کې د طالبانو لخوا په شوي برید کې افغان سرتیرو ته د اوښتې مرګ ژوبلې راپورونه رد کړ او نه یې هم تایید کړ.
هغه وویل "په دې حصه کې زمونږ ټیمونه ورباندې کار کوي او راپور یې نه دی بشپړکړی ترڅو وکولی شو په پشپړه توګه یې له تاسو سره معلومات شریک کړو خو څیړنې روانې دي".
په افغانستان کې د جګړې د ښکېلو خواو ترمنځ د افغان حکومت او طالبانو ترمنځ د جګړو راپورونه او دواړو غاړو ته د مرګ ژوبلې راپورونه په داسې حال کې هره ورځ مخې ته راځي چې طالبانو ته نزدې سرچینو ویلي د طالبانو د قطر پلاوي په پاکستان کې له خپل مشرتابه کسانو سره په لس ورځني اوربند موافقه کړې ده خو خپله طالبانو بیا ویلي چې تراوسه مشورې د اوربند په اړه نه دي بشپړې وشي.