د امريکا په نيويارک ښار کې د کرونا وايرس د خورېدو لړۍ لا هم نه ده ودرېدلې او د ګل په ورځ د چارواکو له خوا ويل شوي چې تر دې دمه لږ تر لږه ۲۰ زره اته سوه او ۷۵ کسانو کې د دې وايرس پخلی شوی دی.
په دغه کسانو کې تر ټولو زيات په نيويارک ښار کې مخې ته راغلي.
د نيويارک د ګورنر اندريو کومو په وينا چې يواځې په نيويارک ښار کې ۱۲زره درې سوه او پينځه کسانو کې د کورونا وايرس پخلی شوی دی.
په نيويارک کې تر دې دمه د دې وايرس له امله ۱۵۷ کسان مړه شوي دي.
د دې وايرس ښکار کسانو کې د درې زره شپږ سوه او يوويشت کسانو تعلق د کوينز، د درې زره څلور سوه او څلور نوي کسان د بروکلېن سره دی.
د دې ترڅنګ دوه زره پينځه سوه او دوه اويا کسان د منهېټن، اتلس سوه نهه ويش کسان د برونز او اته سوه اوولس کسان د سټېټن اي لېنډ سره تعلق لري.
تر ټولو زيات شمېر په کوينز کې مخې ته راغلی خو د سټېټن اي لېنډ په اړه چارواکي وايي چې په يو لاک کسانو کې په يو سل دوه اويا کسانو کې د دې وايرس پخلی شوی دی.
د نيويارک د ګورنر اندريو کومو د وينا ترمخه تر اوسه چې څومره کسان د دې وايرس ښکار شوي، په هغې کې ديارلس فيصده اوس هم په هسپتالونو کې دي چې پکې څلورمه برخه په انتهايي نګهداشت يا اي سي يو کې موجود دي.
د نيويارک ښاروال بل ډي بلاسيو د ګل په ورځ سي اېن اېن ته ويلي چې دوي ته د وينټي لېټرو ضرورت دی او که چرته روانه هفته دوی ته ترلاسه نه شو نو د مړو شمېر به لا نور زياتېږي.
بل اړخ ته ګورنر کوميو ويلي چې دوي د صدر ټرمپ او مرستيال صدر مايک پنس سره رابطه کړې او ورته يې ويلي چې دوي ته د زياتو طبي شيانو، طبي عملې او مالي امداد ضرورت دی.
ګورنر کوميو په ټولنيزو رسنيو ټويټر ليکلي چې دوي د طب د محکمې رېټاير خلکو ته هم خواست کړی ؤ او خوشحاله دی چې شاوخوا دېرش زره خلکو دغه خواست ته غبرګون ښودلی خو نوموړی وايي چې دا شمېره به نوره هم زياتول وي.
د راپورونو ترمخه په ټوله امریکا کې تراوسه پورې په ۳۳ زره ۲۷۵ کسانو کې د کرونا وايرس پخلی شوی او ۴۱۷ کسان يې مړه کړي دي.