د قبایلي ضلعې جنوبي وزیرستان مرستیال کمشنر وايي، د واڼه بازار د امنیت په خاطر بند کړی شوی او چې امنيتي وضع ښه شي د هغې وروسته به بازار پرانستل شي.
د ګل/دوشنبې په ورځ (15فرورۍ) د مرستيال کمشنر د دفتر څخه په جاري شوې اعلاميه کې ويل شوي چې د اتوار په ورځ په علاقه کې د ترهګرۍ د پېښې او ممکنه خطرې ته په کتو نن د نهې/ سه شنبې په ورځ (16) فرورۍ به د واڼه بازار په مکمله توګه بند وي.
په اعلاميه کې ویل شوي خلک دې د واڼه بازار ته نه راځي.
مرستیال کمشنر بشير خان وي او اې ډیوه سره په خبرو کې وویل، د اتوار په ورځ په يوه چاودنه کې درې کسان وژل شوي چې پکې دوه پوځيان او يو عام تن شامل وو او نهه کسان ژوبل شوي وو.
هغه وويل د دغه پېښې وروسته د خلکو د مال او ځان د حفاظت دپاره بازار بند کړی شوی دی.
د جنوبي وزیرستان پوليسو ويلي وو، په 14م فرورۍ ماښام د واڼه په بايي سړک د پوځ کاروان روان وو او ښخ باوردي موادو چاودنه پرې شوې وه.
تحریک طالبان پاکستان د چاودنې زمه واري منلې ده.
د شمالي وزيرستان نه د قومي اسمبلۍ غړي محسن داوړ په ټویټر ويلي، په واڼه کې کرفيو لګول شوې ده.
خو بشير خان وايي کرفيو نه ده لګول شوې او د واڼه بازار نن د يوې ورځې دپاره بند کړی شوی او که د بازار بندولو وخت غځول کيږی په هغې به د علاقې خلک خبرولی شي.
بل لور ته د واڼه د سوداګرو د اتحاديې مشر سردارعلي وي او اې ډیوه ته ویلي دوی ترهګرۍ ځپلي دي او اوس چې ورته د افغانستان سره د سوداګرۍ دپاره د انګور اډې لاره خلاصه شوه سوداګري يې روانه شوه لاره بيا د دوه ورځو راهسې تړل شوې ده.
هغه وويل دوی مالټې، الو او نورو سامانونه راوړلي چې اېښودي يې دي د کروړونو روپو د تاوان سره مخ کيږي.
هغه زیاته کړه د افغانستان نه یې مڼې راغوښتي هغه هم په پوله ايسارې دي.
سردارعلي وويل چاودنې په نور پاکستان کې هم شوي نو هلته خو بازارونه نه دي تړل شوي، او د قبایلي سيمو په صوبه کې د ورګډېدو وروسته اوس دغلته نه وه پکار چې بازارونه تړل کېدی.
ایاز وزیر نومې تن وايي په وزيرستان کې څو ځله په بدلو نومونو د وسله والو تندلارو پرضد عملیات شوي دي خو بيا هم دغلته د ترهګرۍ پېښې کيږي کومه چې د اندېښنې وړ خبره ده.
هغه دا هم وويل د بدامنۍ د پېښو وروسته بيا خلک ځورول کیږي.
خو مرستيال کمشنر وايي د ولس د خونديتوب دپاره يواځې د واڼه بازار تړل شوی دی نوره علاقه خلاصه ده.
او په علاقه کې د خلکو د ځورولو او يا د چا د نيولو په اړه نوموړي وويل څوک ځورول شوي نه دي او د چا د نيولو په اړه مالومات نه لري.