کوټه ـــ د بلوچستان په مرکز کوټه کې د پاکستاني پوځ پر ټرک چاودنه شوې چې د پولیسو په وینا اووه پوځي سرتېري پکې ژوبل شوي دي، د چاودنې ذمه واري تر اوسه کومې ډلې پر غاړه نه ده اخیستې.
د پوليسو يوه چارواکي د نوم نه ښوولو په شرط وي او اې ډيوه ته وويل "د پاکستان د پوځ د سرتېرو ټرک د چاودنې هدف شوی".
د بلوچستان د داخله چارو وزير ضيا لانګو په خبره چاودنه د يوه موټر څنګ ته شوې چې وایي چاودېدونکي توکي په موټر سايکل کې ځای پر ځای کړل شوي وو. نوموړي د پېښې په ځای کې رسنیو ته وویل:
"زموږ د پاک پوځ شپږ ټرکونه د قافلې په بڼه را روان وو او دغه له شا دویم ټرک وو چې په موټرسایکل کې ښخ شوي له درو تر څلورو کیلوګرامه چاودېدونکي مواد ورباندې چاودل شوي دي".
د پوليسو په خبره چاودنه د کوټې ښار پر اېرپورټ سړک د کوتې د پوځي چاونۍ دروازې ته نیژدې له عسکري پمپ او د "بي ايم" مال په نامه کاروباري مرکز مخته شوې ده.
د چاودنې له امله د نیژدې کورونو او عمارتونو شيشې ماتې شوې دي، پوليسو د پېښې ځای په ولقه کې اخيستی او د پېښې ځای ته څوک نیژدې نه پرېږدي.
ضیاء لانګو د دې چاودنې سبب د افغانستان وروستي حالات بللي دي او وایي هند اوس هم د افغانستان له خاورې په ګټې اخیستو پاکستان ناارامه کوي او وایي تر څو چې د افغانستان حالات ښه نه شي پاکستان به هم ناارامه وي.
په چاودنه کې اول د پینځو او وروسته د اوو سرتېرو د ټپي خبر تایید شو. ټپي سرتېري درملنې لپاره د کوټې پوځي روغتون "سي ايم ايچ" ته وړل شوي دي خو دا نه ده څرګنده چې ټپیان په څه حالت کې دي.
د چاودنې ذمه واري تر اوسه کومې وسلوالې ډلې نه ده منلې، د بلوچستان د کورنیو چارو وزیر یې هم په ظاهره پړه پر چا نه ده ور اچولې خو وایي هغه څوک چې پاکستان ناارامه کول غواړي د دې چاودنې تر شا لاس لري.
ياده دې وي چې د چاودنې ځای د کوټي د پوځي چاونۍ په حدود کې راځي، ياد ځای د ښار په زياته حساسو ځايونو کې ګنل کېږي، دلته د بلوچستان د لوړپوړو حکومتي چارواکو تر څنګ د پاکستان د پوځ د لوړپوړو افسرانو تګ راتګ هم له دې لارې کېږي.
په بلوچستان ايالت کې تر دې وړاندې هم د پاکستان پر پوځ او پر نيم پوځي ځواک "ايف سي" او پوليسو باندې بريدونه شوي چې وخت نا وخته يې بلوڅ بېلتون غوښتنکې وسلوالې ډلې او کله نا کله د داسې پېښو زمه واري تحريک طالبان پاکستان او نورو وسلوالو ډلې قبلوي۔
د پاکستان د پوځي لوړ پوړو څارواکو تر څنګ د پاکستان مرکزي او د بلوچستان ايالتي حکومتونو تل د داسې بريدونو تر شا د پاکستان د دښمن ملکونو لاس بللی.