د قبايلي سيمې شمالي وزيرستان نه د کال 2014م د ضرب عضب پوځي عملياتو په مهال کډوالې شوې کورنۍ بېرته ليږل کيږي، دا هغه کورنۍ چې د تېرو پړاوونو څخه پاتې شوې وې.
قبايلي سيمو کې د قدرتي افتونو په وخت د انتظام اداره (پي ډي ایم وایي) د کډوالو بیرته ستنېدو دا پړاو به د روانې مياشتې تر اخره روان وي چې پکې به 93 کلو ته 8000 کورنۍ ستنې کولی شي.
د پي ډي اېم اې ویاند احسان داوړ وایي د واپسۍ دغه عمل د مې د 10م نه پیل شوی او د مې تر 31م نېټه به دوام لري او په دې پړاو کې به هغه کورنۍ بيرته ستنيږي، کومې چې په تېرو پړاوونو کې د بيرته تلو څخه پاتې شوي دي.
هغه وويل چې د ضرب عضب عملیاتو وروسته د شمالي وزيرستان 93 سیمې پاکې ګرځول شوي او دغو سیمو ته د کډوالو بیرته ستنېدو عمل پای ته رسېدلی خو د پاتې شوو خلکو دپاره د دې پړاو خصوصي تابيا شوې ده.
هغه زياته کړه کومې کورنۍ چې د واپسۍ په تیرو پړاوونو کې پاتې شوي هغوي دې خپله واپسي يقيني کړي او په بنو کې دې د کډوالو دپاره جوړ بکا خېل کېمپ سره تماس ونيسي چې هلته یې اندراج وشي.
وي او اې ډیوه سره په خبرو کې هغه وویل د واپسۍ پرمهال به دوی ته ټول د کډوالو ټول مراعات چې پکې هرې کورنۍ ته 35 روپې د ټرانسپورټ، خوراکي توکي او د ضرورت نور سامان ورکولی شي.
احسان داوړ وويل که د دې پړاو نه څوک پاتې شو هغوي به بيا کډوال نه شمارل کيږي او نه به ورسره د کډوالوسره کېدونکې مرستې کيږي.
هغه وويل نزدې 8000 کورنۍ د دغه علاقو پاتې دي او د دوی تعلق د شمالي وزيرستان شواه، سپین وام، میر علي، میرانشاه، دوسلي، ګړیوم او رزمک تحصیلونو د بېلابيلو علاقو سره دی.
په شمالي وزيرستان کې په کال 2014م کې د ضرب عضب په نوم پوځي عملياتو له امله د سيمې نه نزدې یو لک رجسټرډ شوې کورنۍ کډوالې شوې او د کال 2015م د مارچ د میاشتې راهسې د دغو کډوالو بيرته ستنېدو عمل پېل شوی کوم چې تراوسه روان دی.
په کډوالو کې په زرګونو شمیره کورنۍ افغانستان ته کډه شوي او د واپسۍ په ورستي پړاو کې د 7000 نه زیاتې کورنۍ د افغانستان نه بنو ته راوستل شوي دي.
د شمالي وزیرستان دته خېل او شوال هغه تحصلونه دي چې د افغانستان د پولې سره جوختې پرتې دي او تراوسه پورې د دغو سيمو کډوال خپلو سیمو ته نه دي واپس کړی شوي.
د دغو کډوالو سره هره میاشت د نړیوالو په ملاتړ د خرڅ خوراک د پاره 20 زره روپۍ امدادي مرستې کیږي
خو دا کډوال وایي مرستې نه غواړي خو خپلو سیمو ته دې واپس کړل شي.
د پاکستان پوځ په کال 2014م کې په شمالي وزیرستان کې د ترهګرو په ضد د ضرب عضب په نوم په پراخه کچه عملیات کړي وو.
پوځ دعوه کوي چې په دغو عملیاتو کې یې د وزیرستان زیاتره سیمې له ترهګرو پاکې کړي دي خو اوس هم هلته وخت په وخت په پوځ او نورو ځواکونو د بریدونه او په علاقه کې د هدفي وژنو راپورونه مخې ته راځي او دسیمې خلک زیاتره مهال د دې پېښو په ضد احتجاجونه هم کوي.