واشنګټن ــــ پښتون ملتپال سیاستوال او د پښتونخوا ملي عوامي ګوند مخکیني سنېټر او مرکزي جنرل سیکرټري اکرم شاه خان د کېنسر له اوږدې ناروغۍ وروسته د 70 کلنۍ په عمر له نړۍ سترګې پټې کړې.
د هغه زوی مزمل شاه چې د نېشنل ډیموکرېټک موومنټ مرکزي جنرل سیکرټري دی پر خپل ټویټر او فېسبوک لیکلي دي چې پلار یې د جمعې په سهار په کراچۍ کې مړ شو. مزمل شاه پلار ته داسې عقیدت وړاندې کړی دی:
"خوږ وو بابا، د ژوند په بيابان وختونو کې ګڼ سيوری وو، د سړو اوبو چينه وه، د ژوند په تورتمونو کې د رڼا مشال وو، موږ ته د ژوند په سپرليو کې، د ژوند خوږه نغمه وه چې دومره څه سړی وبايلي څومره څه وبایلي".
خوږ وو بابا.د ژوند په بيابان وختونو کې ګڼ سيوری وو، د سړو اوبه چينه وه.د ژوند په تورتمونو کې رڼا مشال وو، موږ ته.د ژوند په سپرلئيو کې، د ژوند خوږه نغمه وه.چې دومره څه سړی و بايلي، څومره څه و بایلي. pic.twitter.com/RFlfagOh4x
— Muzamil Shah (@muzamil_roshan) February 24, 2023
اکرم شاه خان په سکول کې د طالبعلمۍ له زمانې سیاست پیل کړی وو او نه یواځې د زده کوونکو د تنظیم پښتونخوا سټوډنټس ارګنایزېشن په باني غړو کې وو بلکې په پښتونخوا ملي عوامي ګوند کې یې هم فعال سیاست کړی وو.
هغه په 1953م کال کې د بلوچستان د هرنايي ضلعې په ښاهرګه سیمه کې زېږېدلی وو. په 1997م کال کې د پښتونخوا ملي عوامي ګوند له خوا سنېټر شو چې د پخواني پوځي آمر جنرل پروېز مشرف له خوا په 1999م کال کې تر پوځي مارشلا پورې سنېټر وو.
د نېشنل ډیموکرېټیک ګوند مشر او د پاکستان د قومي اسمبلۍ غړي ځوان سیاستوال محسن داوړ د اکرم شاه پر مړینه خفګان ښکاره کړی او پر ټویټر یې د هغه له کورنۍ سره د خواخوږۍ تر څنګ لیکلي، "موږ نن یو مشر لارښود وبایله".
Deeply saddened by the passing away of senior Pashtun leader, ex Senator of PKMAP, scholar and our teacher Akram Shah Lala. Our heartfelt condolences to @muzamil_roshan and to all of his family. We have lost one of our senior mentors today. May Akram Shah Lala rest in peace. pic.twitter.com/j5KmzX1Rny
— Mohsin Dawar (@mjdawar) February 24, 2023
د مشال رېډیو د معلوماتو له مخې اکرم شاه خان په 2002م کال کې لومړي ځل، په 2007م کال کې دویم ځل او په 2013م کال کې درېیم ځل د پښتونخوا ملي عوامي ګوند مرکزي جنرل سیکرټري منتخب شوی وو.
خو په 2015م کال کې چې په ګوند کې اختلافات پیل او بیا پسې زیات شول نو هغه نه یواځې د ګوند هلې ځلې پرېښوې بلکې په غیراعلانیه توګه له سیاسته هم لرې پاته شو.
د اکرم شاه پر مړینې ګڼ شمېر خلکو خواشیني ښکاره کړې او دا یې د پښتنو د ملتپال سیاست لپاره لوی تاوان بللی دی. سیاستوال او د پښتون ژغورنې غورځنګ یو مشر ډاکټر سید عالم مسید پر فېسبوک لیکلي:
"وطن له یو بل سیاست پوهه محروم شو، د پښتونخوا ملي عوامي پارټۍ سابقه مرکزي جنرل سیکرټري، سابقه سنېټر، د پي ایس او بنیادګر او محترم ملګری ارواښاد محترم اکرم شاه یو سیاسي عالم او پېاوړی مبارز وو".
د اکرم شاه خان زوی مزمل شاه وایي چې د پلار جنازه به یې د فرورۍ پر 25مه غرمه د بلوچستان په پښتني سیمه «شاهرګه» کې کېږي او بیا به هملته په خپله پلرنۍ هدیره کې خاورو ته سپارل کېږي.
له عثمان کاکړ وروسته د پښتونخوا ملي عوامي ګوند دا دویم مشر دی چې په مړینه یې د پښتنو قومي سیاست له دوو داسې مشرانو محروم شو چې لسګونه کلونه یې په پاکستان کې د خپلو قومي حقونو او د جمهوریت د پیاوړتیا لپاره مبارزه کړې ده.
اکرم شاه خان د عوامي نېشنل ګوند د مشر اسفندیار ولي خان او د پښتونخوا مليعوامي ګوند د مشر محمود خان اڅکزي په منځ کې