د خېبرپښتونخوا د شمالي وزیرستان په مرکز واڼه کې د پښتون ژغورنې غورځنګ (پي ټي اېم) پرضد مقدمه درج شوې چې پکې د بغاوت او ریاستي ادارو د سپکاوي مادې لګول شوي دي.
د میرانشاه د پولیسو تاڼې په مقدمه کې تور لګول شوی چې په 26مه فرورۍ د پي ټي ایم مشرانو ولسي غونډې ته د ریاست او د ریاستي ادرو پرضد د کرکې وېناګانې کړې دي.
په مقدمه کې ویل شوي چې په ضلع کې په ځای کړی شوې د فساد د مخنيوي مادې سرغړونه شوې ده.
په مقدمه کې د قامي اسمبلۍ غړی علي وزیر، د پي ټي ایم مشر منظور پشتین، عید رحمان، زکیم مداخېل، ډاکټر حیات، ګیلمن پشتین او صمد خان نومول شوي دي.
په مقدمه کې ويل شوي چې د 3000 يا 3500 پورې کسان راټول شوي او وينا کوونکو د رياستي ادارو، د پاکستان د پوځ، پوليس او د موجوده حکومت پرضد د سپکاوي د شر نه ډکه او ناوړه ژبه کارولې ده، ځکه د دوی پرضد د تعزيرات پاکستان د مادو121-123-124A-504-505-506-120B-180-34-153-153A-341-21iJATA لاندې مقدمه درج شوې ده.
د وکيلانو په وېنا دا مادې د بغاوت، رياست او رياستي ادارو د سپکاوي او په ضد يې د خلکو راپارولو په تور کې لګول کيږي.
په میرانشاه سیمه کې د فرورۍ په 26مه د پي ټي اېم يوه ولسي غونډه کړې چې پکې د سیمې نه په لويه شمېره کې خلکو ګډون کړی وو.
غونډې ته په وينا کې د پي ټي اېم مشرانو د حنیف پشتین او نورو بندیوان غړو د خوشي کېدو غوښتنه کړې وه.
دوی ويلي وو په جنوبي او شمالي وزيرستان او نورو پښتون مېشته سيمو کې دې امن په ځای کړی شي.
وینا کوونکو د دې پېښو وجه د شک وړ ګرځولې او د پښتنو د شتمنیو د "لوټېدو" په اړه یې فکرمندي ښودلې وه.
د پي ټی ایم مخکښ او د قامي اسمبلۍ غړي علي وزیر باندې چې تازه دا مقدمه درج نوموړی په وروستیو کې نزدې د دوه نیم کاله بند وروسته له زندانه خوشی شوی دی.
هغه وي او اې ډیوه ته وویل د دوی پرضد مقدمې جوړېدل نوې خبره نه ده، له دې وړاندې هم د دوی پرضد د قتل او د ترهګرۍ د مادو لاندې مقدمې جوړې شوي دي، خو دوی په عدالتونو کې د مقدمو مقابله کړې او بري شوي دي.
هغه وویل تحريک يې په پښتنو د ظلم خلاف شروع کړی د ناامنۍ پرضد دی، جاري به يې ساتي او د مقدمو جوړولو څوک هم دوی د خپلې لارې څخه نه شي په شا کولی.
د پي ټي اېم مشرانو وخت په وخت د پاکستان په پوځ او استخباراتي ادارو په پښتنه سیمه کې د ناامنۍ جوړولو تورنه لګولي خو د پاکستان پوځ په وار وار دا تورونه رد کړي او دریځ لري چې پي ټي ایم د دښمنو هیوادونو په لمسه دا کار کوي او د دې ترڅنګ په پي ټي ایم د بهر نه د پیسو اخستو تورنه هم لګوي، کوم چې د پي ټي اېم مشران یې بې بنیاده ګڼي.