واشنګټن ــــ د افغانستان مخکیني ولسمشر حامد کرزي په شمالي وزیرستان کې د نجونو پر دوو سکولونو بمي حملې غندلې دي او دا یې یو "غیرانساني عمل" بللی دی. په میرعلي ښار کې د دغو سکولونو د تباهۍ خلاف احتجاجي مظاهره شوې ده.
حامد کرزي د پنجشنبې- زیارت په ورځ پر خپل ټویټر او فېسبوک لیکلي، پر ښوونځیو بریدونه "له علم او پوهې سره ښکاره دښمني ده"، چې د ده په وینا د پرمختګ دښمنان یې تر سره کوي.
د شمالي وزیرستان د میرعلي په دوو جلا سیمو هیسوخېل او موسکي کې د مې پر 22مه د شپې وسلوالو د نجونو دوه سرکاري سکولونه په بمونو الوځولي وو. په بریدونو کې چاته کوم زیان نه وو رسېدلی.
د ځایي خلکو په وینا په دغو سکولونو کې شاوخوا 500 نجونو تعلیم کاوه، چې د سکولونو تر تباه کېدو وروسته یې زدکړې متاثره شوې دي.
د نجونو پر دغو دوو سکولونو د بمي بریدونو په خلاف د پنجشنبې- زیارت په ورځ په د شمالي وزیرستان په مرکز کې د نېشنل ډیموکرېټک موومنټ په لسګونو کسانو احتجاج هم کړی دی.
شمالی وزیرستان: نیشنل ڈیموکریٹک موومنٹ کے ساتھیوں نے آج میر علی میں چند دن پہلے لڑکیوں کے اسکولوں کو بارودی مواد سے اڑانے کے واقعے کے خلاف احتجاج کیا۔احتجاج میں پختونخوا کے صوبائی سیکرٹری اطلاعات جمال داوڑ اور این ڈی ایم وزیرستان کے صدر اسد داوڑ سمیت این ڈی ایم وزیرستان کے… pic.twitter.com/tKhuel74Jc
— National Democratic Movement (@NDM_Official) May 25, 2023
این ډي ایم پر خپله رسمي ټویټر پاڼه د دې احتجاج عکسونه خپاره کړي، چې پکې لیدل کېږي احتجاج کوونکو په لاسونو کې شعارپاڼې هم را اخیستې دي او پرې لیکل شوي دي "نجونې هم د تعلیم حق لري"، "په وزیرستان کې دې د نجونو تعلیم و ژغورل شي".
حامد کرزی وایي د داسې بریدونو مقصد دا دی چې "زموږ بچیان په خاصه توګه نجونې د علم او کمال خاوندانې نه شي او ټولنه مو تل د پردو محتاجه پاتې وي"، وایي ډاډمن دی چې دا ډول بریدونه به په پښتونخوا کې د نجونو د تعلیم مخه ونه نیسي:
"د مخربینو دغه شوم اعمال به هېڅکله هم زموږ د بچیانو د درس او تعلیم خنډ نه شي او زموږ بچیان به په قوي هوډ او پراخه حوصله د علم او پوهې عالي درجو ته ځان رسوي".
په رسنیو کې د خپاره شویو راپورونو له مخې د #شمالي_وزیرستان په #میرعلي سیمه کې د نجونو دوه بابه ښوونځي د بمي چاودنو په نتیجه کې تخریب شوي.دغه غیر انساني عمل په کلکو ټکو غندم او د علم او پوهې سره یې ښکاره دښمني گڼم چې د ترقۍ او پرمختگ دښمنان یې ترسره کوي څو زموږ بچیان په…
— Hamid Karzai (@KarzaiH) May 25, 2023
د شمالي وزیرستان د نجونو پر سکولونو د بمي حملو خلاف د پاکستان د وزیراعظم او د پښتونخوا د حکومت له خوا د غندنې څه بیان تر اوسه مخې ته نه دی راغلی. د پښتون ژغورنې غورځنګ مشر منظور پښتین د حکومت پر دغه رویه نیوکه کړې او پر ټویټر یې لیکلي:
"دا هم سرکاري ودانۍ وې خو د وزیراعظم په ګډون د هیڅ سیاسي مشر زړه هم د وینو اوښکې ونه څڅولې، نه پرې عدالتونو افسوس وکړ او په مېډیا کې هم ورباندې ماتم نه لیدل کېږي، د پښتون وطن د بربادیو ذمه وار همدا ریاست دی".
نارتھ وزیرستان میرعلی میں دو گرلز سکول دھماکے سے اُڑا دئے گئے۔یہ بھی سرکاری عمارتیں تھے مگر وزیراعظم سمیت کسی بھی سیاسی رہنما کا دِل خون کے آنسو نہیں رویا، اور نہ عدالتوں کو اِس پر افسوس ہے اور میڈیا میں بھی کوئی ماتم کا سماء نہیں۔پختون وطن کے بربادیوں کا زمہ دار یہی ریاست ہے۔
— Manzoor Pashteen (@ManzoorPashteen) May 22, 2023
د منظور پښتین وروستي تور ته لا کومې ریاستي ادارې جواب نه دی ویلی، خو پوځ او حکومت د پي ټي ایم هغه تورونه تل رد کړي چې وایي په شمالي وزیرستان کې یې په پوځي عملیاتو کې تر ترهګرو پر ځای عام خلک وژلي او د خلکو کورونه یې وران کړي دي.
په میرعلي کې د نجونو پر سکولونو د بریدونو ذمه وارۍ تر اوسه کومې وسلوالې ډلې پر غاړه نه دي اخیستې، خو په دې سیمه کې تحریک طالبان پاکستان وسلواله ډله فعاله ده چې په وروستیو کې یې د پاکستان پر امنیتي ځواکونو بریدونه زیات کړي دي.
په افغانستان کې چې د طالبانو حکومت له تېرو تقریباً دوو کلونو راهیسې تر شپږم ټولګي پورته د نجونو سکولونه بند ساتلي او له تېر دسمبره وروسته یې په پوهنتونونو کې هم د هغوی اعلی تعلیم ځنډولی، دا لومړی ځل دی چې د پښتونخوا په دې قبایلي ضلع کې د نجونو سکولونه په بمونو تباه کړل شوي دي.