د شورو يا چهارشنبې په ورځ ناوخته د پنټاګون په ویب پاڼه خپاره شوې معلومات وایي د امریکا د دفاع چارو وزير لويډ جې آسټن په پنټاګان کې د پاکستان د پوځ د مشر جنرال عاصم منير سره ليدلي او په دوه اړخيزو امنيتي مسلو يې خبرې اترې کړي.
دغه معلوماتو کې زياته کړې شوې: "دواړو چارواکو د وروستیو سیمه ییزو امنیتي پرمختګونو او دوه اړخیزو دفاعي همکاریو پر اړه خبرې وکړې".
د غونډې نه مخکې، د پنټاګون مطبوعاتي سېکتر پټ رایډر د وائس اف امریکا د پنټاګون خبریاې کارلا باب پوښتنې ته په ځواب کې وویل، "پاکستان په سیمه کې د یو مهم شریک په توګه دوام لري. زمونږ اړيکې او همکاري د CENTCOM له لارې روانه وي، او په ځانګړې توګه د ترهګرې پرضد مبارزه پکې مخ په وړاندې بوځو."
د یوې خبریالې پوښتنې ته چې د پاکستان د پوځ مشر په واشنګټن کې دی او په افغانستان کې د ترهګرو د پټ ځایونو پر ضد د امریکا نه د ملاتړ غوښتنه کوي، او ايا امريکا به په افغانستان کې تحريک طالبان پر ضد د ډرون بريدونو کارولو په اړه پاکستان سره همکارې ته رضا شي،
د امریکا د بهرنیو چارو وزارت ویاند مېتيو میلر په ځواب کې وویل، "زه د هغه په غونډو تبصره نه کوم خو په عمومي ډول به ووايم ... مونږ د سیمه ایز امنیت او دفاعي مسلو په اړه د پاکستان سره ملګرتیا ته سترګې په لار یو، مونږه سږ کال یو شمیر ګامونه پورته کړي دي، امریکا او پاکستان روان کال د مارچ په مياشت کې د ترهګرۍ پر ضد د ګډو هڅو لارو لټولو لپاره خبرواترې کړې وې."
د پاکستان د پوځ مشر تېر د اتوار په ورځ واشنګټن ته رارسېدلې وو او د چارواکو د وېنا ترمخه د امریکا د دفاع او بهرنیو چارو د وزارت له لوړ پوړو چارواکو سره به ېې ملاقاتونه کول، خو تر اوسه د دواړو لورو له خوا په دې اړه کوم څه ډېر تفصيلات نه دي شریک شوي.
د پاکستان د پوځ مشر دا سفر په داسې حال کې کوي چې د پاکستان په خېبرپښتونخوا صوبه کې په تشدد کې زیاتوالی راغلی او د پاکستان د امنیتي ځواکونو پر ضد تازه یو خونړي ځانمرګي برید کې ۲۳ عسکر وژل شوي.
رپوټونه وايي چې د امریکايي چارواکو سره د پاکستان د پوځ د مشر د خبرو اترو د اجنډا په سر کې د تحریک طالبان پاکستان (ټي ټي پي) ډلې مخ په زياتېدونکي بريدونه دي.
پروفېسر ډاکټر سید عرفان اشرف، چې په پېښور کې مېشت د افغانستان په اړه د پاکستان د تګلارو کارپوه دی، وائس اف امریکه ډیوه ته ويلي، "امریکا په دې سیمه کې د ترهګرو ډلو په اړه اندېښمنه ده او امریکا او پاکستان دواړه د دغه ډول ډلو پر ضد د ګډو هڅو غوښتنه کوي".
د پاکستان د بهرنیو چارو وزارت په وروستي برید کې د افغان خاورې د کارولو په اړه کوم شواهد او معلومات نه دي شریک کړي، خو د پنجشنبې په ورځ یې په یوه اونیزه بریفنګ کې د افغان طالبانو وغوښتل چې د تحریک طالبان پاکستان پر ضد ګامونه واخلي.
د طالبانو ویاند ذبیح الله مجاهد د پاکستان د بهرنیو چارو وزارت د غه غوښتنو ته په ځواب کې ویلي دي "دا پېښه له افغانستان سره هیڅ تړاو نه لري". د طالبانو ویاند ویلي، که پاکیتان ورسره معلومات شریک کړي نو دوي به ېي پلټنې وکړي."
کارپوهان په دې باور دي چې پاکستان د ښو او بدو طالبانو په اړه د تېرو غلطو پالیسیو له امله له د کورني تشدد سره اوس مخ شوې دی.
د ایکسپریس ټریبیون مدیر نوید حسین وائس اف امریکه ډیوه ته وویل، "د ښو طالبانو او بدو طالبانو په اړه د پاکستان پالیسي غلطه وه، افغان طالبان او پاکستاني طالبان د یوې سکې دوه اړخونه دي، پاکستان د طالبانو د ملاتړ فکر غلط و."
د پاکستان په خېبر پښتونخوا او بلو چستان ضلعو کې کې د راتلونکي کال د فبرورۍ په اتمه نیټه د عامو انتخاباتو نه وړاندې د ترهګرو ډلو بريدونه زيات شوي او په تشدد کې اضافه ليدل کېږي.
د پاکستان د پو ځ مشر جنرال عاصم منير د ا مريکا دا سفر په داسې حال کې کېږي چې امریکا په منځني ختیځ کې د حماس او اسرايل او د اوکراین په جګړه کې بوخت ده.
په واشنګټن کې د څېړنې مرکز ولسن سنټر کې د اسیا د پروګرام مرستیال مشر مایکل کوګلمن امریکا غږ اردو څانګې ته وېلي، "امریکا غواړي چې وګوري جنرال منیر تر کومه حده کولی شي له مهمو عرب هېوادونو سره د خپلو اړيکو په اساس د امريکا سره کومک کولې شي او د امریکا د ډیپلوماتیکو اهدافو ته ګټه رسولې شي."
د یوې پوښتنې په ځواب کې چې پاکستان او امریکا له دې لیدنې څه تمه لري. پاکستان ته د امریکا امنیتي مرستې لا هم ځنډول شوې دي. مایکل کوګلمن وايي، په داسې حال کې چې امنیتي همکاري په ځانګړې توګه د خنډونو سره مخامخ ده. هغلې کوګلمېن واېي چې د امريکا د چارواکو یو هدف به دا وي چې "د دې اړیکو د ساتلو لیوالتیا څرګند کړي."
د امريکا لخوا پاکستان ته دفاعي کومک د تېر امريکاېي صدر ډونلډ ټرمپ د صدارت په وخت کې ځنډېدلې وو چې لا تروسه نه دې بحال شوې.