چین د پنځو کلونو نه د زیاتې مودې راهسې د بلوچستان بیلتون خوښو سره پاکستان کې او په خصوصي توګه بلوچستان کې د خپلې سرمایه کارۍ د خوندي کولو لپاره خبرې اترې شورو کړي دي.
د برتانیې مشهور اخبار فنانشل ټائمز په پاکستان کې د چین د سرمایه کارۍ او دې ته د پیښو خطرو په اړه یو تفصیلي رپوټ کې ليکي چين د بلوڅ بېلتون خوښو سره نېغ په نېغه خبرې پېل کړي دي.
د دې خبرو نه خبر دریو تنانو فنانشل ټائمز ته ویلي، چین د بلوچستان بیلتون خوښو او یاغي جنګیالو سره ځان له نیغ په نیغه خبرې شورو کړي دي. ځکه چې د چین په سرمایه کارۍ شورو کیدونکي زیاتې ترقیاتي منصوبې په بلوچستان کې دي.
اخبار لیکي چې چین د تیرو ۵۰ کلونو نه د نورو ملکونو په کورنیو معاملو کې د ګوتو نه وهلو په پالیسی روان دی. خو ښکاري داسې چین پاکستان کې د هغې خلا ډکول غواړي، کومه چې د امریکې د پاکستان نه د زړه بدي کیدو له امله پیدا شویده.
اخبار لیکلي چې امریکا د تندلارو او د ترهګرو خلاف د پاکستان د زړه پورې اقداماتو نه کولو له سببه د پاکستان نه زړه ماتی شوی دی. په دې سبب امریکا وس د پاکستان نه لاس راښکلی دی.
خو بل طرف ته د پاکستان په سیاست کې د چین په راننوتو هندوستان ډیر وار خطا شوی دی. فنانشل ټائمز د پاکستان یو چارواکي د خلې لیکلي، چینیانو په چوپه خله ډیر لوې پرمختګ کړی دی.
دغه چارواکی وايي چې د بلوچستان بیلتون خوښي خال خال حملې کوي. د ذکر وړ څه حملې یې لا تراوسه پوری نه دي کړي. خو چین د خپلو منصوبو د حفاظت د یقیني کولو د پاره دا قسم خلقو سره په خبرو کولو مجبوره شوی دی.
فنانشل ټائمز په دی لړ کې تیر کال د بلوچستان په ګوادر کې چینانو سره د کار کونکو مقامی مزدورانو د وژل کیدو ذکر هم کړی. ډیرو خلقو دا خبرداری هم ورکړی چې د چین درنه سرمایه کاري به پاکستان نه د چین یو طفیلي ریاست جوړ کړي، ګر چې چین په څو څو کرته ویلي چې د چین پاکستان کې د پوځ ساتلو هیڅ نیت نشته.
فنانشل ټائمز د خپل مضمون په اخر کې لیکلي چې پاکستاني چارواکو د بلوچستان بیلتون خوښو سره د چین په خبرو خوښي ښکاره کړی ده. ځکه د دوي په قول بلوچستان کې په امن او قلارۍ راتلو کې د ټولو خیر دی. پاکستان کې د ډیرو چارواکو خیال دی چې د پاکستان د پوځ امداد د بندولو امریکايي فیصلې د پاکستان خلق او حکومت چین ته نور ورنژدې کړي دي.