د خېبر پښتونخوا په نویو ضلعو کې د صوبايي اسمبلۍ دپاره کېدونکو انتخاباتو نه وړاندې د پاکستان د الېکشن کمېشن یو چارواکي ویلی په ووټونو کې د مېرمنو د برخه اخیستلو حوصله افزايي دې وکړی شي او که چېرې په یوه حلقه کې د ښځو د ووټونه شرح د ١٠ فیصد نه کمه وه نو په دغه حلقه به بیا ټاکنې کولی شي.
د جنوبي وزیرستان ضلعې دپاره د پاکستان الېکشن کمېشن رابطه کار اصف خټک د وي او ای ډیوه سره په یوه مرکه کې وویل په انتخاباتو کې ولاړ امیدواران دې په ووټونو کې د مېرمنو د شرکت حوصله افزايي وکړي.
ښاغلي خټک وویل "او نه به مونږ دا اجازت ورکوو چې یوه پارټي یا یو سیاسي امیدوار ته چې هغوی دې خپلو کې دا فیصله وکړي چې یره زمونږ زنانه چې دي هغه به ووټ نه اچوي."
هغه وویل په کومه حقله کې چې د مېرمنو ووټونه د شرح د مجموعي ووټونو نه ١٠ فیصد کمه وه په دغه حلقه کې به بیا انتخابات کولی شي.
په صوبايي اسمبلۍ کې د باجوړ ضلعې د دریو، مومندو ضلعې د دوو، خېبر د دریو، کرم د دوو، اورکزۍ د یوې، د شمالي او جنوبي وزیرستان ضلعو د دوو دوو او د پخواني ایف رېجنز د یوې چوکۍ دپاره انتخابات د جولايي د میاشت په ٢٠ نېټه کېدونکي دي.
په پخوانۍ فاټا کې د صوبايي اسمبلۍ دپاره د تاریخ دا لومړۍ ټاکنې په داسې حال کې کېدونکي دي چې د پاکستان په قومي اسمبلۍ کې د شمالي او جنوبي وزیرستان نمایندگان، محسن داوړ او علي وزیر، چې د پښتونو ژغورني غورځنگ مشران هم دي، دا وخت په زندان کې دي او د صوبايي انتخاباتو نه وړاندې دوه انتخابي امیدواران هم نیول شوي وو او په دواړو ضلعو کې په ولسي غونډو پابندي لگول شوي وه.
د صوبايي اسمبلۍ امیدواران د پاکستان الیکشن کمېشن په امر ازاد کړی شوي دي او د جنوبي وزیرستان دپاره د کمېشن رابطه کار اصف خټک وویل په ضلع کې د قانون ١۴۴ دفعه لرې کړی شوې دي. د دغه قانون دلاندې په ولسي غونډو پابندي وي.
ښاغلي خټک وویل په جنوبي زیرستان کې د انتخاباتو تیار مکمل شوی دی، انتخابي مواد سیمې ته رسول شوي دي او د انتخابي عملې د تربيي کار روان دی.
د اصف خټک تفصیلي خبرې دلته اورېدلی شئ:
Your browser doesn’t support HTML5
په جنوبي وزیرستان کې د انتخاباتو تیارۍ مکمل شوی، چارواکی وايي