د خېبرپښتونخوا په شمالي وزيرستان ضلع کې د امنیتي ځواکونو په کاروان ځانمرګي برید کې د درېو عسکرو په ګډون څلور تنه وژل شوي او څلور نور ژوبل شوي دي.
دا پېښه د ګل/ دوشنبې په ورځ [8 اګست] د شمالي وزيرستان د ميرعلي په پتسي اډې سيمه کې شوې ده.
امنيتي چارواکو او پوليسو دغه پېښه تاييد کړې ده. د شمالي وزيرستان د پوليس دفتر ويلي، د ابتدايي معلوماتو ترمخه دا ځانمرګی بريد وو.
د امنیتي چارواکو سرچينې ويلي، دا د امنیتي عسکرو د معمول کاروان د ميرانشا نه بنو ته روان و او د پتسي اډې سره چې کاروان تېرېدو نو ورسره په رکشه کې چاودنه وشوه.
د سرچينې په وېنا دا نه ده معلومه چې په رکشه کې چاودېدونکي مواد اېښودل شوي وو که دا ځانمرګی بريد دی.
ويل شوي په پېښه کې مړي او ژوبل په ميرعلي کې د اېف سي روغتون ته وړل شوي دي.
په سمدستي توګه د دې پېښې زمه واري چا نه ده منلې.
د روغتون سرچینو وي او اې ډیوه ته تاييد کړې چې روغتون ته څلور مړي او څلور ژوبل راوړل شوي دي.
ويل شوي په مړو کې يو پوځي او دوه د ملېشې عسکر او يو عام تن شامل دی.
د میرعلي پولیسو په وېنا د پېښې سمدست وروسته موقعې ته په ګڼ شمېر کې پوليس لېږل شوي، علاقه په ګېره کې اخستل شوې او د لټون عملیات پېل کړی شوي دي.
په څلورمه جولايۍپه شمالي وزيرستان کې د پوځ په ګاډي ځانمرګی بريد شوی چې د لومړو معلوماتو ترمخه پکې 15 پوځيان ژوبل شوي وو او هم په دغه ورځ په ټانک کې په پوليسو وسله وال بريد کې دوه پوليس وژل شوي وو.
د دغه بريد زمه واري چا نه وه منلې.
په شمالي وزیرستان کې دا تازه او وخت په وخت بريدونه په داسې حال کې کيږي چې د پاکستان او تحریک طالبان پاکستان ترمنځ ډز بندي روانه ده.