د بلوچستان د پولیس مشری ډي اي جي اظفر میسر ویلي د پولیس هغه دوه عسکر د دندې څخه لېرې کړل شوي دي چې په سوشل میډیا خپره شوي وډیو کې لېدل کېږي چې یو پولیس عسکر ماشوم د سر د وېښتونه نیولی او بل عسکر داسې ښکاري چې د ماشوم نه څه پوښتنې کوي.
ډي اي جي اظفر ميسر د جمعې په ماښام د دغه ويډيو په حقله خبري کانفرنس وکړ او له رسنيو سره يې په خبرو کي وويل پر ماشوم تشدد کونکي د پوليس دواړه عسکر له دندې ګوښه کړی شوي دي.
ښاغلي میسر وویل په پېښه کې ککړ د پولیس عسکرو په ضد مقدمې درج شوي اوهم په هغه تاڼه کې بنديان کړی شوي دي چيري چي پر ماشوم تشدد شوی و.
ماشوم سره د پولیس د سلوک په اړه میسر وویل " په يو جرم کې تورن کس ته بغير له کوم عدالتي حکم څخه سزا ورکول ناقانونه او ناروا عمل دی، دا ناروا عمل که هر څوک ترسره کوي له هغه سره به د قانون مطابق عمل کيږي او عدالت ته به وړاندي کيږي."
د جمعې په ورځ پر ټولنيزو رسنيو خپره شوي په ماشوم د پولیس د مبینه تشدد وډیو وډیو په ډير کم وخت کې زياته خپره شوه او د ولس عکس العمل وروسته د بلوچستان د پولیس مشر د ملزمانو خلاف اقدامات وکړل.
د اظفر ميسر په خبره دا پېښه اته مياشتې وړاندې رامنځ ته شوې وه او هغه وخت پر ماشوم تور لګول شوی و چې له يو دوکان څخه يې موبايل غلا کړی و. د پولیس مشر وویل په ماشوم دغه تور نه دی ثابت شوی.
ډي ايي جي دا هم وويل چې د ماشوم پر ضد کومه قانوني پرچه هم نه وه درج شوي او بغېر د قانوني لارې چارې د پښتون اباد د پوليسو تهاڼې ته بوتلل شوی و.
په سوشل میډیا د دې خبرې ستاینه شوي چې په ماشوم د تشدد ملزمان پوليس عسکر د قانون منګولو ته وسپارل شوو.