د شمالي وزيرستان په مرکز ميرانشاه کې درې ورځې وړاندې پېل شوی احتجاجي پرلت نن د اتوار، يکشنبې په ورځ وروسته له هغې وځنډول شو چې د پرلت د مشرانو په وېنا پوځي او انتظامي چارواکو ورته د غوښتنو منلو باور ورکړو.
د احتجاجي پرلت ځنډول کېدو نه وړاندې د سيمې نه د پارلیمان غړي محسن داړو ګډون والو ته په وېنا کې وويل، چې د دوی ټولې غوښتنې ومنل شوې، خو که په دغو غوښتنو عمل ونه شو نو دوی به بيا احتجاجي پرلت پېلوي.
درې ورځې وړاندې د شمالي وزيرستان د مرکز ميرانشا نه پينځه کلومیټره لويديځ پله لرې په همزوني سيمه کې په احتجاجي مظاهره چيانو ډزې شوې وې.
احتجاج کوونکو تور لګولی ؤ چې دوی په علاقه کې د ګرځبندېز (کرفيو) پرضد مظاهره کوله او په دغه مهال پرې پوځ نېغ په نېغه ډزې کړې چې پکې په ځای يو تن وژل شوی او د ۱۱ پورې نور ژوبل شوي وو، خو په ژوبلو کې پرون يو بل تن ژوند د لاسه ورکړی دی.
د يادې پېښې سمدست وروسته د محسن داوړ په مشرۍ په ميرانشاه کې احتجاجي پرلت پېل شوی ؤ.
دوی غوښتنه کوله چې د ډزو په پېښه کې دې د ککړو پوځيانو پرضد د پوځي قانون لاندې سخته کارروايي (کورټ مارشل) وشي، او د پنجاب په څېر يې د وژل شوؤ او ژوبلو دپاره مالي مرستې غوښتې وې.
د سيمې دپاره پوځي مشر (جی او سي) په پېښه کې د وژل شوؤ دپاره پينځه لاکه او ژوبلو دپاره د دوه لاکه روپو ورکولو اعلان کړی ؤ.
خو احتجاج کوونکو دې مرستې ته ټوقه ويلي ؤ چې په دغو خلکو پورې خندنی شوی دی.
نن د اتوار، يکشنې په ورځ د شمالي وزيرستان انتظاميې او احتجاجي پرلت يو مشر ملک اصغر داوړ وي او ای ډيوه سره په خبرو کې پخلی وکړو چې پرلت وځنډول شو.
د انتظاميې په وېنا د پرلت ټولې غوښتنې ومنل شوې او عمل به پرې کولی شي.
اصغر وويل چې دوی ته د غوښتنو منلو پوره باور ورکړی شو، چې يو کمېشن به جوړولی شي او هغه به د دغه پېښې پلټنې کوي.
هغه وويل ورته باور ورکړی شو چې د وژل شوؤ دپاره به ورته د ۱۵ نه تر ۲۰ لاکه او ژوبل دپاره به د لسو لاکو روپو ورکولو اعلان کولی شي.
هغه زياته کړه دا هم ورته باور ورکړی شو چې په سيمه کې به نور غېر اعلاني ګرځبندېز نه وي او يواځې د اتوار په ورځ به د معمول کرفیو لګولی شي.
اصغر وويل بې د تپوسه به پوځ د چا کور ته نه ورځي، د علاقې مشر يا د انتظاميې کوم چارواکی به ورسره وي او لومړی به هغه کور ته خبرتیا ورکولی شي.
د پرلت يو بل ګډون وال ملک عمر خان وويل، په وزيرستان کې ډېری مسلې دي او د هغې د هوارولو دپاره دوی يواځينۍ حل لاره د احتجاجي پرلتونو په شکل کې پېدا کړه.
وي او ای ډيوه سره په خبرو کې هغه وويل که چارواکي يې غوښتنې نه مني يا د هغوی سره کوم ظلم زیاتی کيږي نو د سیمې خلک به يې پرضد هم دغه پرامنه احتجاجي پرلت کوي.
