په قبايلي ضلع جنوبي وزيرستان کې د نورو قبايلي ضلعو په څېر انتخابي کمپاين روان دی خو دغلته په جلسو کې د ووټونو غوښتو سره د سيمې نه د قامي اسمبلۍ د بنديوانو غړو او پي ټي اېم د مخکښ مشرانو د خوشي کولو غوښتنې هم کیږي.
نن د جمعې په ورځ د جنوبي وزيرستان په مرکز واڼه کې عوامي نيشنل ګوند، پاکستان پيپلز پارټۍ او يو ازاد کانديد درې جلسې کړي او په درې واړو کې د علي وزير او محسن داوړ د خوشي کولو غوښتنې شوي دي.
د عوامي نیشنل ګوند ځايي مشر نثار لالا ويلي چې د علي وزير او محسن داوړ بنديوان ساتل د وزیرستان د خلکو رايو ته سپکاوی دی.
هغه وويل د سيمې نه دواړه منتخب غړي د يو پلان لاندې بنديوان کړی شوي دي.
د پيپلز ګوند عمران خان مخلص چې د جنوبي وزيرستان د ۱۱۴ حلقې نه کانديد دی هغه ويلي علي وزیر او محسن داوړ پارلیمان ته د سيمې د خلکو مسلې وړلې وې چې واکمن پرې خبر کړي خو حکومت دغه خبرې نه شوې زغملی او د هغوي د خبرې د مخې نيولو په موخه يې دوي بنديوان کړه.
مخلص وويل که څه هم دوي د قامي اسمبلۍ منتخب غړي بنديوان کړه خو نوموړي ځان ته په اشارې کولو سره وويل اوس به د سيمې څخه صوبايي اسمبلۍ ته بل علي وزير او محسن داوړ لاړ شي.
پرون د د زیارت، پنجشنبې په ورځ د جمعيت علما اسلام ف ډلې د سيمې مشر مولانا عبدالشکور په واڼه کې د خپل ګوند پلويانو ته په جلسه کې د علي وزیر او محسن داوړ د خوشي کولو غوښتنه کړې او ويلي يې ؤ د سيمې نه د پارلیمان منتخب غړي بنديوان کولو د سيمې د خلکو په حقونو ډاکه اچول دي.
هغه ويلي که ياد دواړه منتخب غړي په پارلیمان کې وي نو دوي به د خپلو خلکو د حقونو تپوس وکړي.
د شمالي او جنوبي وزیرستان څخه د قامي اسمبلۍ منتخب غړي او د پښتون ژغورنې غورځنګ مشران محسن داوړ او علي په پوځي چيک پوسته د بريد او د پوځيانو په ګاډی د چاؤدنې په تورنو مقدمو کې بنديوان دي.
د يادو دواړو کسانو دپاره پيپلز ګوند د قامي اسمبلۍ اسپيکر اسد قېصر ته د پروډکشن ارډر یا اسمبلۍ ته د راوستو د امر کولو خواست کړی خو هغه نه ؤ منظور کړی.
د پيپلز ګوند مشر بلاول بټو زرداري او د عوامي نيشنل ګوند د خېبرپښتونخوا صوبې مشر اېمل ولي خان بيا بيا د علي وزیر او محسن داوړ د پروډکشن ارډر جاري کولو خبره کوي او د پاکستان تحریک انصاف په حکومت نيوکې کوي او وايي د دوي سره امتيازي سلوک کيږي ګنې د اسمبلۍ نور بنديوان غړي راوستل کيږي خو يواځې دوي بند کړی شوي دي.
