دخیبر پښتونخوا په لکی مروت سیمه کې دیو څلور کلن ماشوم د وژنې په ضد په ګنډي چوک کې د پولیسو خلاف دسیمې خلکو سخت احتجاج کړی اؤ قهرژنو مظاهره چیانو دپولیسو تاڼې ته د اورونو اچولو ترڅنګ دسیمې لویې سړک یا انډس هائی وی هم دهر رقم ټریفک دپاره تړلی دی.
د وژل شوي څلور کلن ماشوم اویس مور وایي ځوئ یې یوه میاشت مخکې بې درکه شوی ؤ خو پولیسو دهغوئ مقدمه نه درج کوله.
د وژل شوي ماشوم خور وائس اف امریکه ډیوه سره خبرو کې ویلي دهغې ماشوم ورور یوه میاشت وړاندې بې درکه شوی ؤ اؤ تیره شپه یې وروست شوی مړی دهغوئ د کور مخې ته غورځول شوی دی .
په احتجاج کې شاملې د اویس خور وایي مونږ به ترهغې دخپل ماشوم ورور مړی نه ښخوؤ اؤ احتجاج به کوؤ تر څو چې د ماشوم اویس قاتلان نه وي نیول شوي.
د اویس مور وویل مونږ به د خپل ماشوم بچي ورستې غوښې اؤ ډهانچې تر هغې په سړکونو ګرځوؤ تر څو چې دهغه د وینو سره انصاف نه وي شوی.
تر دې وړاندې د د روان کال دمئ په میاشت کې هم دپاکستان دپلازمینې اسلام اباد څخه یوه لس کلنه پښتنه ماشومه فریشته د کوره بې درکه شوې وه چې یوه اوونۍ وروسته یې بیا مړی د اسلام اباد د شهزاد ټاؤن د ځنګل څخه ترلاسه شوی ؤ.
د ماشومې فریشتې پلار هم ویلي وؤ چې هغه د خپلې لور د ورکیدلو دمقدمې درج کولو دپاره پولیسو ته ډیرې زارۍ کړې وې خو پولیسو دهغه مقدمه نه درج کوله.
دماشومې فریشتې په وژنه ګرد هیواد کې پښتنو احتجاجونه کړي وؤ چې له هغې وروسته لوړپوړي حکومتي اؤ امنیتي مشران د فریشتې کور ته ورغلل اؤ هغوئ سره یې دفریشتې د قاتلانو دنیولو ژمنې وکړې خو د فریشتې پلار ګل نبي وایي اوس هم اصلي قاتل پولیسو نه دی نیولی.
په دې وروستیو کې په پاکستان کې دماشومانو د بې درکۍ ، په هغوئ دجنسي تیري اؤ وژلو پېښې د اندېښنې تر حده سیوا شوي اؤ تیره میاشت هم د خیبر پښتونخوا په بټګرام سیمه کې یو ماشوم د جنسي تیري په هڅه کې وژل شوی ؤ.
ه پاکستان کې د غېر دولتي ادارې ساحل د شمېرو ترمخه په کال ۲۰۱۸ کې د ماشومانو د جنسي تيريو او د هغو د ځورولو ۳۸۰۰ پېښې رپوټ شوې وې.
د يادې ادارې ترمخه په ملک دننه د ورځې په سر ۱۱ ماشومان (هلکان او جينکۍ) د جنسي حملو ښکار کيږي.
ساحل وايي په پاکستان کې ماشومانو سره د جنسي تيريو زیاتې پېښې په پنجاب صوبه کې مخې ته راځي.
د ماشومانو په حقونو کار کوونکی عمران ټکر وايي، په ملکي کچه د کم عمره ماشومانو د جنسي تيريو په اړوند قانون موجود دی خو د جنسي تيريو د مخنیوي او د دې ترڅنګ د تيري وروسته هغې ته ځواب ويل په ځای پاتې شي.
وي او ای ډيوه سره په خبرو کې هغه وويل که انتظاميه، پوليس، عدالتي نظام، د صحت محمکه او نورې اړونده ادارې دې ته په وخت ځواب اووايي نو مخه يې نيول کېدی شي.
