پاکستان مېډیکل ایسوسي اېشن اندېښنه څرګنده کړې چې مرکزي حکومت د خام مال درآمد کولو دپاره د ډالرو ورکولو نه ډډه کوي او دې سره به په پاکستان کې د دوايانو کمی جوړ شي بايد مرکزي حکومت زر تر زره د دوایانو جوړولو دپاره د خام مال ایل سيز پرانيزي.
بل اړخ ته په خېبرپښتونخوا کې د دوایانو کاروباریان وایي د خام مال د کمي له وجی د دوایانو بیعې لوړې شوي او که خام مال نه راځي نو د ژوند ژغورولو دوايانې به کمې شي.
د پاکستان مېډیکل ایسوسي اېشن عمومي سيکتر ډاکټر عبد الغفور وایي دا ډېره د اندېښنې وړ خبره ده چې د فارما يا دوايانو د صنعت سره یوازی د 15 ورځو د خام مال ذخیره موجود ده او یوه میاشت وروستو به په پاکستان کی د ژوند بچ کوونکې دوایانې ختمې شي او د خلکو ژوند به د خطرو سره مخ شي.
"دا یوه غټه المیه ده خدای دې نه کړي که د دوايانو بحران جوړ شونو ناروغان به چرته ځي او ډېر داسې د زړه او دمې او شوګر ناروغان دي چې هغوی په امروزه حساب دوايانو ته ضرورت لري په پاکستان کی د صحت نظام د وړاندې څخه کمزوری دی او که په ملک کی د دوایانو کمی راشي نو یو غټ انساني بحران به پېدا شي".
پاکستاني مطبوعات وایي مرکزي بېنک کاروباري بینکونو ته زباني ویلي چی لیټرز آف کریډټ د پرانستو څخه ډډه وکړی خو مرکزي بېنک د روانې میاشتې په وړومبۍ نېټه دا خبرونه رد کړي او ویلي وو چې داسې قسمه خبرونه په مارکیټ کې د بې یقینۍ پېدا کولو دپاره خپریږي.
د روان مالي کال په وړومبيو کې مرکزې بېنک د پیسو کاروبار کوونکو ته ویلي وو چې درآمد کوونکو ته د ډالرو ورکولو نه وړاندې به د مرکزي بېنک څخه اجازه اخلي او په وروستو کې د پاکستان مرکزي بېنک د ملک نه بهر تلونکو کسانو دپاره د ډالرو مقدار د 10000 نه 5000 او د 2000 ډالره اخستو دپاره اي اکاونټ خلاصول هم لازمي کړي چی د ملک نه ډالرز بهر لاړ نه شي.
په خېبرپښتونخوا کې د دوایانو د کاروباریانو مشراکرام خان وي او اې ډیوه ته ويلي، د خام مال د کمي له وجې په مارکیټ کې د دوایانو بیعې یو په شل سېوا شوي دي. د پېنا ډال ګولو يو ډبی د 280 روپو نه 800 روپو پورې ګران شوی دی
"کله چې هم د ډالر نشتوالی راشي نو یقین وساتئ کارخانه دار به پیداوار ودروي او په مارکیټ کې به د دوایانو قلت جوړ شي او ولس به هم مشکلاتو سره مخ شی".
پاکستان د دوایانو خام مال د هند، چین او نړۍ د نورو هیوادونو څخه راغواړي.
مرکزي بېنک وایي د روان مالي کال په وړومبو درېو میاشتو کې درامدات 12فيصده کم شوي او د بهر هیوادونو څخه راتلونکو درامداتو دپاره د ډالرو ضرورت وي او په ملکي کچه د مرکزي بېنک سره د غېر ملکي زرمبادله ذخیره 7.4 اربه ډالره ته کمه شوی.
