ليبيا کې ډوبه شوې کشتۍ کې د 16 مړي ترلاسه شوي، ټول د پښتونخوا دي

د پاکستان د بهرنيو چارو وزارت ويلي، ليبيا کې چې کومه کشتۍ ډوبه شوې، تراوسه پورې پکې د 16 کسانو مړي ترلاسه شوي او ټول د خېبرپښتونخوا صوبې دي.

د بهرنيو چارو د وزارت په وېب پاڼه ورکړل شوو معلوماتو ترمخه، په 16 مړو کې 13 يواځې د کورمې دي، يو يو د باجوړ، اورکزو او پېښور دي.

خبر کې ويل شوي، د دغو کسانو پېژندګلو د پاسپورټونو څخه شوې ده.

د بهرنيو چارو وزارت زياته کړې، د ناتاييد رپورټونو ترمخه، په ډوبه شوې کشتۍ کې 63 پاکستانيان سواره وو، په دوی کې 37 ژغورل شوي، يو په روغتون کې او 33 د پوليس په بند کې دي، لس پاکستانيان بې درکه دي، او درې په طرابلس کی دي.

له دې وړاندې د پاکستان د بهرنيو چارو وزارت په لسمه فرورۍ ويلي وو،کشتۍ کې د پاکستانيانو په ګډون 65 کسان سواره وو، او په دغې اړه طرابلس کې د پاکستان سفارتخانه د ځايي چارواکو سره په رابطه کې ده.

د بهرنيو چارو دفتر ويلي وو، د ليبیا پایتخت طرابلس کې د پاکستان سفارتخانې ویلي، کشتۍ د ليبيا شمال لويديځ زاويه ښار کې د مرسا ډيلا بندر سره نزدې ډوبه شوې وه، او سفارتي چارواکي د زاويه روغتون ته لېږل شوي چې د ډوبو شوو پېژندګلو کې مرسته وکړي.

د تېرې جنورۍ د میاشتې په 16مه د پاکستان د بهرنيو چارو دفتر ویلي وو، د موريتانيا څخه سپېن ته تلونکې يوه کشتۍ چې 80 تنه پکې سواره وو، ګڼ یې پاکستانيان وو، ډوبه شوې وه.

له دې وړاندې د کډوالو د حقونو دپاره کار کوونکې غېر دولتي ادارې [واکنګ بارډرز] ويلي وو، 50 تنه کډوال چې زياتره یې پاکستانيان وو، د لويديځې افريقې څخه سپېن پله تلونکې کشتۍ کې ډوب شوي وو.

له دې وړاندې چې اکثره دغه ډول پېښې شوي، زياتره پکې د پنجاب صوبې خلک معلوم شوي دي.

په شپږمه جنورۍ د پاکستان وزیراعظم شهباز شريف په مشرۍ يوه غونډه کې د بشري قاچاق جاج اخستل شوی او نوموړي ويلي وو، بشري قاچاق کې د ککړو سرکاري چارواکو ضد پورته کړل شوي اقدامات د ستاينې وړ دي، او بشري قاچاق، انساني سمګلنګ کې د ککړو ټولو ډلو ضد یې د سختو قانوني کارروايانو او د عبرت نخښه جوړولو حکم یې کړی وو.

په 2015 او 2016 کلونو کې یونان، د منځني ختیځ، افریقا او اسیا څخه تلونکو کډوالو او پناه غوښتونکو لپاره اروپا ته د ننوتلو تر ټولو د خوښې لاره وه او شاوخوا لس لکه خلک د دې هیواد په جزیزو کوز شوي وو.

په کال 2023م کې د یونان سره نزدې په بحیره روم کې یوه کشتۍ چپه شوې وه، د 400 نه د زیاتو پاکستانیانو په ګډون پکې نزدې 800 کډوال سواره وو د هغوي له جملې څخه یوازې 104 کسان ژوندي ژغورل شوي وو.