د امریکا صدر ډانلډ ټرمپ د زیارت/پنجشنبې په ورځ اعلان وکړ چې امریکا به اېف-۳۵ ډوله پرمختللي جټ جنګي جهازونه په هند خرڅ کړي، او هند به په هغو یو لږ شمېر هېوادونو کې راشي چې د دغسې پرمختللې الوتکې خاوند اوسي کوم چې د رېډار نه هم بچ پاته کېدلی شي.
صدر ټرمپ چې د هند له وزیراعظم نریندر مودي سره وایټ هاوس کې خبریالانو ته خبرې کولې، وویل: "سر د دې کال نه به مونږ په هند باندې د خپلو پوځي سامانونو د خرڅلاو پیمانه څو بلین ډالره اضافه کړو. همدا راز موږ لګیا یو دا لاره هواروو چې هند ته د اېف-۳۵ جټ الوتکې مهیا کړو."
د امریکا صدر همدا راز وویل، هغه دا توقع لري چې د هند سره "غیرمعمول تجارتي تړونونه" لاسلیک شي. هغه دا خبرې د نرېندر مودي سره د خپلو خبرو اترو په پیل کې وویل.
د امریکا صدر ویلي دي چې په تجارتي مالونو باندې ټېکسونه، هم د امریکا په ملګرو او هم تجارتي رقیبانو باندې لګوي. ټرمپ په نورو ملکونو دا تور لګولی چې ګني له ډېرو مودو راهېسي یې د امریکا نه غلطه فایده اخېستې ده.
ټرمپ د زیارت په ورځ دا خبر هم ورکړ چې هند به د امریکا نه تېل واخلي.
ټرمپ پخپلو خبرو کې خبریالانو ته دا هم وویل چې غواړي د هند له وزیراعظم سره د تجارت په اړه هم خبرې اترې وکړي.
وزیراعظم مودي دا ټینګار هم وکړ چې په دې خبرو اترو کې به د هند ملي مفاداتو ته ارجحیت ورکوي. هغه همدا راز صدر ټرمپ ته د هند د سفر رسمي بلنه ورکړه.
د وي او اې د پارسي څانګې نه په مننه
Forum