د امریکا صدر ډانلډ ټرمپ د معدنیاتو د لوظنامې لاسلیک کولو دپاره د زیارت/پنجشنبې په ورځ په اوکراین فشار سېوا کولو ته دوام ورکړ او یقین یې څرګند کړ چې ماسکو هم د اوکراین جنګ د ختمولو دپاره یو تړون ته آماده دی.
ټرمپ د نېټو غړو ملکونو ته هم یو پیغام درلود او هغه دا چې، "که هغوی مصرف ونکړي، نو زه به یې دفاع نه کوم."
ټرمپ د روس او اوکراین ترمنځ د امن معاهدې دپاره چې څنګه به په کې کردار لوبوي، هم خپل تصور وړاندې کړ. هغه وویل: "زه فکر کوم څه چې کیږي هغه دا دي چې اوکراین غواړي یو جوړجاړی وکړي، ځکه زما په نظر هغوی بله چاره نلري. زه دا فکر هم کوم چې روس غواړي یو جوړجاړی وکړي، ځکه په یو ځانګړي او جدا قسم، داسې ډول چې صرف زه ورباندې پوهېږم، صرف زه پوهېږم، هغوی هم بله چاره نلري."
ټرمپ د زیارت په ورځ دا هم وویل چې هغه به "شاید په آینده یوه نیمه میاشت کې" په سعودي عرب کې د روس صدر ولاډیمیر پوټین سره وګوري.
د یو بل خبر ترمخه، صدر ټرمپ اعلان وکړ چې هغه به ډېر ژر د قریب دوه لکه څلوېښت زره (۲۴۰۰۰۰) اوکرایني وګړو په اړه امریکا کې د هغوی د پاته کېدو یا اېستلو په باب فیصله وکړي. دغه اوکرایني وګړي د اوکراین-روس جګړې نه امریکا ته راتښتېدلي او دلته کې ورته د اوسېدنې موقت قانوني دستاوېزات ورکړی شوي. اوس ټرمپ وایي، هغه په دې غور کوي چې دغه دستاوېزات منسوخه کړي او که نه.
سعودي عرب ته د خاص استازي سفر:
د ټرمپ انتظامیې یو جګپوړي چارواکي د زیارت/پنجشنبې په ورځ وویل چې هغه به د اوکرایني استازو سره د لیدنې دپاره سعودي عرب ته ولاړ شي چې د روس د پوځي یرغل په جنګ کې د یوې ډزبندۍ په باب خبرې وکړي.
سټيف وېټکوف چې د منځني ختيځ په چارو کې د امریکا د صدر ډانلډ ټرمپ خاص استازی ګڼل کیږي، وویل: "مونږ اوس په دې خبرې اترې کوو چې په ریاض، او یا هم احتمالآ په جده کې د اوکراینیانو سره یو ملاقات تنظیم کړو."
هغه زیاته کړه: "نظریه دا ده چې د امن د یوې لوظنامې دپاره یو طریقه کار راواېستل شي او یو ابتدایي ډزبندي هم حاصله شي."
وېټکوف وویل، صدر ټرمپ داسې احساس کوي چې د اوکراین په صدر ولودیمیر زېلنسکي کې، په وایټ هاوس کې د دوو مشرانو ترمنځ د لفظي کشیدګۍ نه پس، بدلونونه راغلي دي. هغه احساس کړې چې د زېلنسکي خط یو ډېر مثبت اول قدم و. هلته کې یوه معافي غوښتنه وه. هلته کې دا منل شوي و چې امریکا د اوکراین ملک دپاره ډېر څه کړي دي، یو د قدردانۍ حس په کې و."
په همدې حال کې زېلنسکي د یورپي مشرانو سره د فوري مذاکراتو دپاره د بلجیم سرښار براسلز ته تللی دی.
د پولېنډ وزیراعظم ډونالډ ټسک چې د یورپي اتحاد دوره اي صدارت یې په غاړه دی، وویل: "مونږ به د روس په نسبت ځانونه ژر تر ژره، په زیاتې ځېرکتیا او زیاتې وړتیا سره په وسلو سمبال کړو."
د یورپي کمېشن مشره اورزولا فون ډېرلېن د یو داسې پلان تجویز کړی چې د بجټ ضابطې په کې راکمې کړی شي څو هغه ملکونه چې غواړي په دفاعي چارو ډېرې پیسې ولګوي، دا کار وکړی شي. همدا راز دا ژمنې هم په کې شته چې د یورپي اتحاد ټول ۲۷ غړي ملکونه دې وهڅول شي چې په آینده څلورو کلونو کې ټولټال شاوخوا ۸۶۳ بلینه ډالر دفاع ته ځانګړې کړي.
زېلنسکي وویل: "مونږ ډېر قدردانه یو چې یوازې نه یو، او دا صرف د خولې خبرې ندي. زمونږ احساس همدا دی. دا ډېره اهمه ده."
د فرانس صدر اېمانوېل مېکرون د دغو خبرو نه وړاندې وویل چې د یورپي اتحاد غړي به "مخ په وړاندې فیصله کنه ګامونه اوچت کړي".
مېکرون په دې اړه چې د ټرمپ د مشرتابه لاندې امریکا د اوکراین دپاره د خپلو مرستو پالیسي بدله کړې ده، د فکرمندۍ اظهار وکړ. هغه وویل: "په کار نده چې د یورپ په آینده دې په واشنګټن او یا ماسکو کې فیصله وشي."
د زیارت/پنجشنبې په ورځ د فرانس دفاع وزیر خبر ورکړ چې هغوی اوس د اوکراین سره استخباراتي معلومات شریکوي. دا ګام پس د هغه اخېستل شوی چې امریکا په اوکراین باندې د خپلو استخباراتي معلوماتو شریکول بند کړل.
څېړونکي وایي که څه هم یورپي ملکونه به د اوکراین دپاره خپل امداد کې اضافه راولي، مګر هغه مرستې او همکارۍ چې امریکا د اوکراین سره کولې، یورپي ملکونه د هغه ځای نشي ډکولی.
Forum