ټرمپ د حماس سره د نېغ په نېغه خبرو تصدیق وکړ

د امریکا صدر ډانلډ ټرمپ د زیارت/پنجشنبې په ورځ دا تصدیق وکړ چې د هغه انتظامیه د حماس ډلې سره، چې د امریکا لخوا ترهګره ډله ګڼل کیږي، په مذاکراتو کې ده چې پاته یرغملان ترې راخوشې کړي. ټرمپ همدا شان هغه الټيمېټم یا ضرب الاجل تکرار کړ چې که چېرته پاته یرغملان سمدستي آزاده نشي، نو په غزه کې به "قیامت" راوستی شي.

صدر ټرمپ چې د وایټ هاوس په اوول آفیس کې خبرې کولې، د یو خبریال دې پوښتنې ته چې د قیامت راوستلو نه یې مقصد څه دی، وویل: "تاسو ته به یې پته ولګي."

ټرمپ په دې خبرو کې هغه لیدنه هم رابرسېره کړه چې د شورو/چهارشنبې په ورځ یې د خوشې شوو اسرائیلي یرغملانو سره درلوده. هغه وویل: "ما دا افتخار درلودو چې پرون مې د څو هغو کسانو سره ښه ډېر وخت تېر کړ کوم چې مونږ رااېستلي و، او هېڅ باور نشم کولی چې د هغو سره څومره بده رویه شوې وه."

تر دې وړاندې، د زیارت په ورځ د منځني ختیځ دپاره د صدر خاص استازي سټيف وېټکوف په وایټ هاوس کې خبریالانو ته ویلي و چې ممکن د امریکا د انتظامیې لخوا "د اسرایلیانو سره په مشترکه توګه، ځیني اقدامات ترسره کړی شي."

وېټکوف همدا راز وویل: "حماس یوه موقع لري چې معقول عمل وکړي، هغه څه وکړي چې سم دي، او بیا ووځي."

د وتلو نه د وېټکوف منظور د امریکا او اسرائیل هغه مطالبات و چې وایي حماس دې د جنګ نه پس غزه کې هېڅ قسمه پوځي یا سیاسي کردار ونلري.

نه صدر ټرمپ او نه هم وایټ هاوس دې پوښتنو ته څه جواب ویلي چې آیا د غور لاندې اقداماتو کې به پوځي عمل هم شامل وي که نه. د دې نه وړاندې چارواکو ویل چې هغوی به امریکایي عسکر غزې ته نه لېږي.

د ټرمپ دا فیصله چې د یرغملانو د خلاصون دپاره یې د خپل خاص استازي اډم بوېلر په مشرۍ د حماس سره نېغ په نېغه خبرې پیل کړې، د واشنګټن په دې اوږدمهاله پالیسي کې غټ بدلون ښيي چې د ترهګرو سره مذاکرات نه کوي.

ټرمپ وویل: "مونږ په هغو مذاکراتو کې د اسرائیل مرسته کوو، ځکه مونږ د اسرائیلي یرغملانو په اړه خبرې کوو. او مونږ د حماس په زړه هېڅ کار هم نه کوو. مونږ نغدې پېسې نه ورکوو."

د اسرائیل د وزیراعظم بنیامین نېتنیاهو دفتر په یو بیان کې ویلي چې اسرائیل "د حماس سره د نېغ په نېغه خبرو په باب امریکا ته خپل دریځ روښانه کړی دی."

حماس ویلي چې د یرغملانو د خلاصون دپاره بهترینه طریقه، د ډزبندۍ مذاکرات دي. حماس زیاته کړې چې د ټرمپ لخوا ګواښونه، اسرائیل هڅوي چې د غزې د ډزبندۍ له هغه څو مرحله یي معاملې نه په شا شي کوم چې د جنوري په ۱۹مه، د ټرمپ د سوګند اخېستو نه یوه ورځ مخکې ورباندې اتفاق شوی و.

د حماس یو چارواکي، سامي ابو ظهري په ټېلګرام چېنل باندې د یو بیان په خپرولو ویلي دي: "د ګواښ/دړکو لهجه مونږ نشي وېرولی، دا صرف حالات نور هم پېچلي کوي."

صدر ټرمپ د شورو/چهارشنبې په ورځ په ټروټ سوشل باندې، حماس ته په خطاب کې ولیکل چې: "ټول یرغملان همدا اوس راخوشې کړئ، وروسته نه، او په فوري توګه د هغو خلکو جسدونه هم واپس کړئ چې تاسو قتل کړي دي، کنه نو خپل کار تمام ګڼئ...زه اسرائیل ته هر هغه څه ورلېږم چې هغوی د کار ختمولو دپاره ورته ضرورت لري، که تاسو هغسې ونکړل لکه زه چې درته وایم، نو د حماس یو غړی به هم محفوظه نه وي."

د ټرمپ انتظامیې په دې هفته کې اسرائیل ته څلور (۴) بلینه ډالر د وسلو په مد کې ولېږل. دا په یوه میاشت کې دویم ځل دی چې د ټرمپ حکومت، د کانګرس نه د اجازت اخېستو بغیر، اسرائیل ته وسلې او ګوله بارود ورلېږي.