د کېنېډا واکمنې لبرل پارټۍ مارک کارني د وزیراعظم په توګه منتخب کړی

د کېنېډا واکمن لبرل پارټۍ یا ګوند په واضحه اکثریت سره پخوانی بېنکار مارک کارني د دغه هیواد د راتلونکي وزیراعظم په توګه غوره کړی دی.

د جسټن ټروډو د استعفا وروسته چې د تیر نهو کلونو راهسې وزیر اعظم و ، واکمنې لبرل پارټۍ ته د وزیراعظم د چوکۍ لپاره د نوي مشر انتخاب کول وو.

د لبرل پارټۍ څه باندې یو لاک پنځوس زره غړو په دغه ټاکنو کې رایه ورکړه. د اتوار، یکشنبې په ورځ د خپرو شوو نتیجو ترمخه مارک کارني د پارټۍ د 86 فیصده غړو ملاتړ ترلاسه کولو کې بریالی شوی .

کارني د 2008 څخه تر 2013 پورې د کېنېډا بېنک او د 2013 څخه تر 2020 پورې د بېنک اف انګلېنډ مشر و.

هغه د 2008 مالي بحران د اثراتو نه کېنېډا د ژغورلو وروسته بیا برتانیا د هغه خدمات ترلاسه کړي وو او هغه یې د بېنک اف انګلېنډ مشر ټاکلی ؤ.

مارک کارنی په 1694م کال کې د بېنک اف انګلېنډ د جوړیدو وروسته د دغه بېنک لومړی بهرنی مشر و.

مارک کارني مشهور پنګه اچونې بېنک ګولډمېن سېکس سره هم کار کړی دی. او په 2003م کال کې د کېنېډا د بېنک مرستیال مشر ټاکل کیدو وړاندې د 13 کلونو لپاره په لندن، ټوکیو، نیویارک او ټورنټو کې خدمات ترسره کړي.

مارک کارني په سیاست کې تجربه نه لري او تر دې دمه په کومه سیاسي عهدې نه دی پاتی شوی.

د کېنېډا د قانون ترمخه مرکزي انتخابات باید په هرو پنځو کلونو کې تر سره شي. په دغه حساب سره په کېنېډا کې انتخابات به د روان کال 2025 اکتوبر په 20مه ترسره کېږي.

خو د جسټن ټروډو د استعفا وروسته په دغه هېواد کې د وخت نه وړاندې د انتخاباتو اوازې راپورته شوې.

تر نهه کاله پورې وزیراعظم پاتې کیدو وروسته ، ټروډو د روان کال په جنورۍ کې د لبرال پارټۍ دننه د کمېدونکي مقبولیت او اختلافاتو له امله خپله استعفا اعلان کړه، چې وروسته لبرال ګوند نوی وزیراعظم وټاکلو.

په کېنېډا کې وزیراعظم په پارلېمان کې د اکثریت لرونکي پارټۍ یا ګوند مشر وي، چې انتخاب یې د ګوند د غړو په رایو کیږي.