د ملګرو ملتونو سیکرټري جنرل د شام په ساحل کې د تاوتریخوالي په زیاتوالي اندېښنه ښودلې

د ملګرو ملتونو سیکرټري جنرل یا عمومي مشر انتونیو ګوتېریش د ګل، دوشنبې په ورځ د شام په ساحلي سیمه کې د تاوتریخوالي په ناڅاپي زیاتوالي اندیښنه څرګنده کړې ده، چرته چې امنیتي ځواکونو د زیارت ،پنجشنبې د ورځې راهیسې د پخواني ولسمشر بشارالاسد د وفادارو وسله والو سره په نښتو کې ښکیل دي، او په سلګونه ملکي وګړي پکې هم وژل شوي دي.

د ګوتېریش ویاند سټیفن ډوجاریک خبریالانو ته وویل: "په شام کې د وینې تویدنه باید په سمدستی توګه ودرولی شي او د سرغړونو مسؤلونو سره حساب وشي." سټیفن دوجاریک زیاته کړه : " د شام د ټولنو اندیښنې باید په معقول ډول حل کړلی شي."

دوجاریک وویل چې د ملګرو ملتونو مشر په تاوتریخوالی کې په لویه کچه زیاتوالي چې پکې "د عدالت پرته وژنې، د ټولې کورنیو وژنو په ګډون ، او د یو این ار ډبلیو ای یوه همکار په وژل کیدو" اندیښنه ښودلې ده.

جګړه د زیارت- پنجشنبې په ورځ هغه مهال پیل شوه چې د پخواني اسد رژیم وفادارو وسله ‌والو د لاذقیه صوبې په جبله سیمه کې په امنیتي ځواکونو برید وکړو.

دا برید درې میاشتې وروسته له هغې وشو، چې د هیئت تحریر الشام په مشرۍ مخالفینو د شام پخوانی صدر بشار الاسد له واکه لری کړو.

د یاغیانو د ځپلو لپاره د شام حکومت زرګونه جنګیالي د هېواد له بېلابېلو سیمو د ساحلي سیمو لور ته واستول. که څه هم دا جنګیالي د نوم په لحاظ د نوي حکومت تر چتر لاندې دي، خو لا هم ځینې بې‌نظمه ملیشې فعالې دي، چې پخوا د بشري حقونو په سرغړونو تورنې شوې دي.

د بشارالاسد وفادار وسله وال د هیواد د علوي اقلیت سره تړاو لري، هماغه مذهبي ډله چې د بشارالاسد کورنۍ وسره تعلق لري.

د رپورټونو له مخې د ډسمبر په نیمایي کې د موقتي چارواکو له خوا واک تر لاسه کولو وروسته تر ټولو خونړۍ نښتې کې د دواړو خواوو ګڼ شمېر جنګیالي وژل شوي دي.