رپورټ : د نړۍ زیاته برخه آبادي په خچنې هوا کې ساه اخلي

د نهې ، سه شنبې په ورځ په یوه رپورټ کې ویل شوي چې د نړۍ زیاته برخه آبادي خچنې هوا کې ساه اخلي، او په ټوله نړۍ کې یواځې 17 فیصدي ښارونه د هوا د ککړتیا لارښوونې پوره کوي.

په سوئټزرلېنډ کې مېشت د هوا کیفیت د څارنې ډیټابیس آی کیو ایئر (IQAir) په 138 هېوادونو کې، د هوا کیفیت څارنې 40,000 سټیشنونو ډیټا تجزیه کړې او معلومه کړې چې چاډ، بنګله دیش، پاکستان، کانګو، او هند ترټولو خچنه هوا لري.

د آی کیو ایئر لخوا د مرتب شوو معلوماتو تر مخه، په 2024م کال کې، افریقایي هېواد چاډ او د جنوبي ایشیا هېواد بنګله دیش په ترتیب سره د انتهایي خچن هېوادونو په کتار کې لومړی او دویم ځای لري چیرته چې د سموګ يا په فضا کې خچنوالي اوسط کچه د نړیوال صحت ادارې لخوا وړاندیز شوي معیار څخه پینځلس چنده لوړه وه.

د خچنو هېوادونو په نوملړ کې پاکستان په درېیم، کانګو څلورم، او هند پینځم نمبر دي. په رپورټ کې د هند پایه تخت نوي ډیلي د نړۍ تر ټولو خچن پایه تخت ګرځول شوی.

آی کیو ایئر وايي چې یواځې اووه هیوادونه د هوا کیفیت په معیارونو پوره خیژي، او په دغه هېوادنو کې آسټرالیا، نیوزيلېنډ، بهاماس، بارباډوس، ګرېناډا، استونیا او آیس لېنډ شامل دي.

د آی کیو ایئر رپورټ له مخې، د 2.5 پي ایم په نامه د وړو خطرناک او مضر ذراتو کچه په چاډ کې په هر مکعب فټ کې 91.8 مایکرو ګرامه ، او په بنګله دیش کې دا کچه په هر مکعب فټ کې 78 مایکرو ګرامه ثبت شوې.

د صحت نړیوال تنظیم اندازې یا اټکلونه وایي چې د هوا ککړتیا نه هر کال په نړۍ کې شاوخوا اووه میلینه خلک وژل کېږي.