د پاکستان بلوچستان ایالت کې د مرستندویه ادارې ایدهي کارکونکو ویلي څلور ورځې وړاندې د کوټه سول هسپتال لخوا ترلاسه شوي ۱۰ مړي يې په دشت سیمه کې خاورو ته سپارلي.
د دغه ادارې چارواکو وي او ای ډیوه ته ویلي دغه مړي ورته د بلوچستان حکومت سول هسپتال لخوا ورکړل شوي وو، په دغه ټولو تشدد شوی وو چې نه يې پیژنګلو کیده او نه يې وارثان معلوم وو.
په بلوچستان کې د بې درکه خلکو سازمان واېس فار بلوچ مېسنګ پرسنز دعوه کوي دغه مړي د بې درکه بلوڅانو وو.
د دغه سازمان مشر ماما قدیر بلوڅ وي او ای ډیوه ته ویلي دغه مړي د بې درکه بلوڅانو وو، چې مړي يې د ډیروخت راهسې په هسپتالونو کې پراته وو.
ماما قدیر وړاندې وایي ٫٫ د بې درکه بلوڅانو مړي خپل خپلوانو ته نه ورکول کیږي او نه دوي خبرول کیږي. حکومت دوي ته د ترهګرو نومونه ورکوي خو دا ترهګر نه دي، بې درکه بلوڅان دي دوي وژلي او اوس یې ایدهي ادارې ته سپارلو له ورکړي.٬٬
په بلوچستان کې د مرستندویه ادارې ایدهي کسانو ډیوه ته ویلي وړاندې هم دغه شان مړي دوي ته د سپارلو لپاره ورکړل شوي. دغه بې شناخته مړي به دوي مخکې د کوټه سره نژدې په یوه لویه هدیره کې خاورو ته سپارل خو اوس په دغه هدیره کې د ځاې د کموالي له امله دوي په دشت سیمه کې داسې مړي سپاري.
په بلوچستان کې د بشري حقونو د سازمان مشر طاهر حبیب ایډوکیټ وي او ای ډیوه ته ویلي د سپارل شوو مړو ډي این ای دې وشي اودوي دې معلوم شي چې دا څوک وو.
طاهر حبیب وايي ٫٫ هاېي کورټ یا عدالتونه دا اختیار لري چې د دغه مړو د ډي این ای کولو امر ورکړي. دا کار اوس ډیر اسان دی چې د داسې مړو پیژندګلو وشي.٬٬
د بلوچستان صوبايي حکومت ویاند انوار الحق کاکړ د دغه مړو په اړه ناخبري ښودلی او وي او ای ډیوه ته وايي هغه ته د دغه مړه په اړه هیڅ معلومات نشته او کله چې ترې خبر شي نو بیا به پرې څه اويل شي.
د واېس فار بلوچ مسنګ پرسنز مشر ماما قدیر بلوچ تور لګوي حکومت وړاندې هم دغه شان بې درکه کسان په تشدد وژلي او بیا یې پټ خاورو ته سپارلي. د ماما قدیر په وینا تر اوسه پورې د سلو نه سېوا بې درکه کسان وژل شوي او بیا په اجتماعي یا ګډو قبرونو کې سپارل شوي.
