په پاکستان د صحت قامي اداره وايي په ټول هیواد کې د کرونا اومیکرون کېسونو شرح 2.85% زیاته شوې او تر ټولو زیات کېسونه د سيند صوبې په کراچۍ ښار کې مخې ته راغلي چرته چې د مثبت کېسونو شرح 22فيصده ته رسېدلې ده.
پاکستاني مطبوعات د صحت د قامي ادارې په حواله وايي، د کراچۍ ښار وروسته د کرونا د مثبت پېښو شرح د خيبر پښتونخوا په دویم لوی ښار مردان کې 8.77% ته رسېدلې ده.
خو د مردان د صحت د محکمې ضلعي مشر ډاکټر کچکول خان وي او اې ډیوه ته وایي د کرونا ناروغانو شمېر زیات شوی خو کومو خلقو چی ویکسین لګولي په هغوی د دې اثرات کم دي.
هغه وويل په مردان کې د مثبت کېسونو شرح د 1% نه هم کمه ده.
هغه وويل، په ښار کې د ویکسینو لګولو مرکزونه فعاله دی او ويړيا ویکسین لګول کيږي د دې نه علاوه ګرځنده ټیمونه هم خپل کار کوي او چا چې دویم خوراکه نه وي اخستي يا ويکسين يې نه وي لګولي هغوی ته ویکسین لګوي او د ضرورت مطابق بوسټر ډوز یا ویکسین هم خلقو ته لګول کيږي.
د صحت قامي ادارې نن د جون په 27 نیټه ويلي په تېر شواروز کې په ټول ملک کې 13412 مجموعي معاينې شوي چی پکې 382 مثبت پېښې رپورټ شوي دي. او په ملک کې د مثبت کېسونو شرح 2.85% ریکارډ شوې ده.
د ادارې په وینا دوه کسانو ژوند د لاسه ورکړی او په ټول ملک کې د 87 ناروغانو حالت مرګونی دی.
په مردان ښار کې ډاکټر عبدالوهاب وي او اې ډیوه ته ويلي، خلکو د کرونا ناروغۍ نه د بچ کېدو احتیاطی تدابیر پرېښودي دي او بیا زیات خلک د بوسټر خوراک اخستو څخه هم ډډه کوي دوی وایي په فوري توګه بوسټر ویکسینو لګولو ته اړتیا ده.
هغه وويل، په انساني بدن کې کله ویکسین د دې ناروغۍ مقابله وکړي نو قوت مدافعت پیدا کيږې که د چا یوه میاشت شوي وي او که د چا درې میاشتې خو بوسټر ډوز لګول پکار دي یو ځل بیا حالات خراب دي او لوی اختر وروسته د حالاتو خرابېدو اندېښنه بيا موجوده ده.
د صحت قامي اداره وايي په ملک کې د کرونا اومیکرون نه د سيند صوبه زیاته متاثره ده چی پکې مجموعي د مثبت کېسونو شرح 6.17%، پنجاب کې 1.71%، خېبر پښتونخوا 1.15%، کراچی ښار 22.65 فيصده، پېښور 3%، مردان 2.31%،ایبټ اباد 4.17او نوښار کې د مثبت کېسونو شرح 5% ده.
ويل شوي يو ځل بيا ماسک اچول لازمي ګرځول شوي دي.
د سرکاري شمېرو ترمخه په پاکستان کې د کرونا څخه تراوسه پورې ټول 30390 کسان مړه شوي دي.
