د شمالی وزیرستان پولېټېکل انتظامیې وي او اې ډیوه ته په یوې رالېږلې خبر پاڼه کې ویلي دي چې د افغانستان او پاکستان ترمنځ د غلام خان لاره د سوداګرو لپاره په تجربوي توګه پرانستل شوې ده.
په خبر کې وړاندې راغلي دي ددغې لارې له پرانستلو سره لومړۍ چوپه سوداګریز توکي افغانستان ته ولېږدول شول.
د غلام خان لاره په شمالي وزیرستان کې د ۲۰۱۴ پوځي عملیاتو له وخته تړل شوې وه.
پاکستاني چارواکي وايي، د غلام خان لارې پرانستل د دواړو هېوادونو په ګټه دي او د سوداګرو لپاره یو ګټور ګام دی. ځايي سوداګرو د اوږدو مودې راهیسې له حکومت څخه د دې لارې د پرانستلو غوښتنه کوله.
د غلام خان لاره د چمن او تورخم وروسته د افغانستان او پاکستان ترمنځ د سوداګرۍ دریمه لویه لاره ده.
د پاکستان او افغانستان ترمنځ د سیاسي تاوتریخوالي وروسته د تېرو څو کلونو راهیسې، سوداګري ډېره اغېزمنه شوې او پاکستاني چارواکي وايي، چې دوه اړخیزه سوداګري په سلو کې پنځوس راکمه شوېده.
د افغانستان او پاکستان د سوداګرۍ او صنایعو د ګډې خونې مشر زبېرموتي والا وايي "د پاکستان او افغانستان سوداګري نيمه کمه شوې ده او په تېر دوه کالونو کې د ۲.۷اربه ډالرو څخه ۱.۲ ډالرو ته راټيټه شوې ده".
پښتانه سوداګر وايي، ددغې لارې د تړل کېدو له امله ټول سوداګریز تاوان یواځې دوی ته رسېدلی.
