سیاستوال، د رسنیو مشهور شخصیتونه او کنزروېټیو یا زاړه پاله فعالانه د جمعې په ورځ د کانفرنس/غونډې په دویمه ورځ هم موجود وو.
د امریکې نایب صدر جی ډي وېنس د زیارت، پنجشنبې، په ورځ د کنزروېټیو پولېټيکل اېکشن کانفرنس/سي پي ای سي نومې غونډې پرانیسته کړې وه.
د جمعې په ورځ کانفرنس کې ویناوالو د ټرمپ د حکومت لومړنۍ میاشت وستایله، چې په ترڅ کې یې لسګونه صدارتي فرمانونه صادر کړي، او پراخ بدلونونه یې وړاندیز کړي او د حکومت مختلفو پالیسیو او نړیوالو مسایلو ته یې نوې بڼه ورکړې ده.
د صدر ټرمپ د ملي امنیت سلاکار، مایک والټز، د جمعې په ورځ د کانفرنس ګډونوالو ته وویل چې د ټرمپ حکومت هڅه کوي د یوکراین جګړې پای ته رسولو لپاره د امریکا پانګوالو ته د یوکراین د معدني شتمنیو برخه ورکړي، ترڅو د دې هېواد د دفاع لپاره شوي لګښتونه بېرته ترلاسه کړي.
که څه هم د اونۍ په پیل کې، د یوکراین صدر ولادیمیر زلنسکي یو وړاندیز رد کړې چې له مخې یې امریکايي شرکتونو ته د یوکراین د نایابه معدني شتمنیو ۵۰ فیصده ملکیت ورکول کېده، خو والټز وویل چې د دې وړاندیز نوي بڼې سره به زلنسکي اتفاق وکړي.
والټز وویل چې د ټرمپ حکومت د مخدره موادو په سوداګرو سخت ګوزارونه کوي، او د شورو/چهارشنبې په ورځ، د امریکا د بهرنیو چارو وزارت یو شمېر د مېکسیکو کارټېلونه د ترهګرو ډلو په توګه پېژندلي.
خبریالې او اوسني سیاستوالې، کاري لېک، چې ټرمپ ویلي وو غواړي د امریکا د غږ مشري ورکړي، د صدر د لاسته راوړنو او د زړو رسنیو په وضعیت یي خبرې وکړې.
اغلې لېک وویل: دا چې صدر ټرمپ یوازې په یوه میاشت کې دومره زیات کارونه ترسره کړي، چې حیرانه کوونکې دي.
هغې د حکومت د موثریت لپاره د ایلان مسک تر مشرۍ لاندې د ادارې اقدامات وستایل او وویل چې د بهرنیو مرستو بندول د کرپشن په ضد د مبارزې برخه ده.
لېک وویل، چې پخپله د ایریزونا ایالت لپاره نږدې ۳۰ کاله د ټيلیویژن خبریاله وه، خو زیاته یي کړه، چې د کرونا وایرس د خبرونو له امله یې جرنلزم پرېښودو.
هغې زیاته کړه: مونږ لا هم د جعلي خبریالانو د محاصرې لاندې یو.
اغلې لېک وویل، چې هغه په دې باور ده چې "د مین سټریم میډیا/رسنیو هدف مونږ خبرول نه دي پاتي بلکې دا زمونږ نه ګټه پورته کول دي.
لېک خپلو خبرو کې وویل چې د ۲۰۲۰م کال د ټاکنو د نتیجو په اړه د اې پي رپورټونه د حقیقت خلاف دي، او ادعا یې وکړه چې هغوی لا هم هڅه کوي چې ۲۰۲۰م کال تر ټولو خوندي ټاکنې وښيي.
لېک دا هم وویل چې هغه ویاړ کوي چې ټرمپ هغه د وي او اې د مشري لپاره نومولې، او زیاته یي کړه چې هغه به خبري ایجنسي د کره او صادق راپورونو ورکولو په جوړولو تمرکز وکړي.
اغلې وویل، وې او اې د له ۸۳ کلونو راهیسې نړۍ ته د امریکا غږ رسوي. ځینې وختونه ټیک او د نه منلو وړ وي او ځینې وختونه دا د افسوس وړ وي ، لیک زیاته کړه، مونږ د معلوماتو په جنګ کې یو، او له ریښتیا څخه بله ښه وسله نشته، او زه باور لرم چې وي او اې کیدای شي دا وسله وي.
د هغو کسانو په منځ کې چې د ایجنسۍ د پرې کولو غوښتنه یې کړې، مسک دی.
هغې وویل، مونږ به د ټرمپ ټیلیویژن نه شو. خو اغلې د امریکا نور ټي وي چینلې په سختو ټکویادې کړې چې د صدر ټرمپ په مخالفت کې د حده اغوښتي دي.
صدر ټرمپ به د خالي په ورځ دې کانفرنس ته وینا کوي.
په زاړه پاله سیاستي مېدان کې د سي پي ای سي غونډو د ټرمپ په بره تګ کې مرسته کړې ده او د صدارت په مخکنۍ دوره کې هغه هر کال د تنظیم غونډې ته تقریرونه کړي دي.
تېرکال د سي پي ای سي غونډې ته تقریر کې ټرمپ لوظ کړی و چې که چېرې هغه د نومبر صدارتي انتخاب وګټي نو د هغه په قول د دروغجنو، دهوکه بازانو، درغلي کوونکو او سېنسرشپ کوونکو د هغو خلکو دپاره به د فېصلې ورځ وي چې زمونږ حکومت يې نیولی دی.
د امریکې د صدر ډانلډ ټرمپ په شمول د ارجېنټینا، برطانيي، پولېنډ او د اټلي کنزروېټیو یا زاړه پاله سیاسي مشران به د واشنګټن سره نږدې د زاړه پاله سیاسي مشرانو درې ورځنۍ غونډې ته تقریرونه کوي.
د امریکې نایب صدر جی ډي وېنس د زیارت په ورځ د سي پي ای سي نومې د غونډې پرانیسته وکړه.
د غونډې په مختلفو نشستونو کې د کرېپټو کرنسۍ په شمول په مختلفو موضوعاتو بحثونه شوې او په منځني ختیځ کې د امن په موضوع یوه ناسته کې د حماس په ولکه کې د اسرایلي یرغمالانو خپلوان هم شرکت کوي.
د امریکې د کانګرس د هاوس اف رېپرېزېنټېټیوز سپیکر مایک جانسن، د برطانيي پخوانۍ وزیراعظمه لېز ټرس او د هنګري د وزیراعظم وېکټر اوبان سیاسي مشیر بالبز اوربان هم د زیارت، پنجشنبې، په ورځ غونډې ته تقریرونه کړي.
د کانفرنس ته په نورو خطاب کوونکو کې د اټلي وزیراعظمه جورجیا مېلوني، د سلوېنیا وزیراعظم رابرټ فیکو او د ارجېنټینا صدر هاوېیر ميلي شامل دي.
یادونه: د دې خبر ځینې معلومات د ای پي خبري ادارې نه اخیستل شوي دي
Forum