باېرن ډانلډز د اوکراېن په اړه د صدر ټرمپ د پالیسۍ دفاع کړې

د روس سره د اوکراین جګړه څلورم کال ته داخل شوې، که یو اړخ ته د روس د صدر پيوټن سره د صدر ټرمپ د ملاقات په اړه خبرې کیږي نو بل اړخ ته اوکراین د جګړې ختمولو د هڅو د یوې برخې په توګه تمه کیږي چې زر تر زره به زېلنسکي د امریکې سره د معدنیاتو په اړه تړون لاسلیک کړي. صدر زېلنسکي هم تاید کړې چې د تړون په مسوده کار کوي.

د امریکا د فلوریډا نه د کانګرس غړي باېرن ډانلډز د وي او ای ډیوه سره د یوې ځانګړې مرکې په مهال د اوکراېن جګړې ختمولو په اړه د صدر ډانلډ ټرمپ د پالیسۍ دفاع کړې او زیاته کړې یې ده،" که اوکراېن د خبرو اترو میز ته کښیني او جګړه پاې ته ورسیږي نو اوکراېن او ټولې اروپا ته به يې ګټې ورسیږي".

باېرن ډانلډز وویلي، "زما د پوهې تر مخه یو داسې جوړ جاړی یا پریکړه کیږي چې پخپله صدر زیلنسکي هم ورته په شخصي توګه تیار وو. خو بیا ترې وروسته شو".

د وي او اې ډيوه نفیس ټکر ترې هم په دې اړه پوښتنه وکړه چې د اوکراېن په اړه د صدر ټرمپ لخوا اعلان شوي پالیسۍ باندې په اروپا او دلته په واشنګټن کې د ډیموکرېټانو لخوا سخت غبرګون مخې ته راغلی. دغې هر څه ته تاسو څه وايۍ؟

نو ځواب کې د فلوریډا نه د کانګرس غړي باېرن ډانلډز وویل، "زما په فکر مونږ ټول غواړو چې دغه جګړه ختمه شي. په لومړي پړاو کې د اوکراېن جګړه شورو کیدل نه وو پکار. کله چې جوباېډن ولسمشر وو او روس د اوکراېن سرحدي سیمو ته پوځ ورغونډوو. نو جو باېډن له پکار وه چې هم په دغه وخت کې یې دغه هر څه ودرولي وی. خو جو باېډن دغې ته پام وه نه کړو او دا بدمرغي ده چې مخې ته راغله. اوس چې صدر ټرمپ غواړي چې دغه جګړه ختمه کړي، نو دواړه خواوې به هغه څه ترلاسه نه کړي چې کوم څه غواړي".

ښاغلي وویل، " د بده مرغه چې کوم څه په میډیا کې روان دي نو خلک د دې نه جلا تاثر اخلي چې یو اړخ به خپله خوښه ترلاسه کړي. خو داسې به نه وي. مونږ له په دې اړه ډاډه اوسیدل پکار دي او صدر ټرمپ پخپله په دې هر څه پوه او ډاډه دی".

نوموړي زیاته کړه، " نو زېلنسکي ته به زما مشوره دا وي، چې میز ته دې راشي، جوړ جاړی دې وکړي. دغه روانه جګړه دې ختمه کړي او حالت دې هغه ځاې ته ورسوي، چې د اروپا هیوادونه په سوله کې ژوند وکړی شي. او زه به دا اوایمه چې دا هر څه به د اوکراېن په ګټه هم وي چې دوي د امریکا اقتصادي ملګری جوړ شي کوم چې به د دوي په ګټه وي".

د افغانستان په اړه:

څو ورځې وړاندې د امریکې خارجه وزیر مارکو روبیو ویلي د طالبانو د واکمنۍ دلاندې په افغانستان کې داسې علاقې شته چې د حکومت د واک اختیار نه بهر دي او انتهاپسندې ډلې په کې د فعالیت موقعې لرلی شي.

د امریکې خارجه وزیر وویلي فکر نه کوي چې د ناین الېون نه د مخکې په شان حالات موجود دي خو هرکله چې داسې سیمې وي چې د حکومت د واک اختیار نه بهر وي نو داسې قسمه ډلو دپاره موقعې پېدا شي.

هم د مارکو روبیو د دې خبرو په اړه د کانګرس غړي باېرن ډانلډز نه پوښتنه وشوه چې ایا تاسو ګڼۍ چې د افغانستان په اړه په پالیسۍ کې به کوم بدلون راشي؟

نو ځواب کې باېرن ډانلډز وویل، " زه نه یم خبر او زه نه غواړم چې د سېکټري روبیو او صدر نه وړاندې په دې اړه څه اویمه. خو صدر باېډن د امریکا د تاریخ تر ټولو بد راوتل کړي".

هغه وویل، " کله چې دغه کار کیدو نو مونږ ټولو ته معلومه وه چې ددې به په راتلونکي کلونو کې د امریکا او په سیمه کې د امریکا ملګرو هیوادونو لپاره بدې نتیجې وي". او زیاته یي کړه، " د داعش او القاعده په افغانستان کې بیا راپورته کیدل د دغې ثبوت دی".

کانګرس غړي ښاغلي ډانلډز وویل، " نه غواړي چې د دغې په اړه د مخکې نه څه اوایي چې امریکا به څه کوي. خو تاریخ باېد روڼ وي چې که چرې په راتلونکې کې د امریکا امنیت ته خطر وي او یا په سیمه کې د امریکا ملګرو ته د ترهګرۍ کوم خطر جوړیږي نو دغه به د جو باېډن او ډیموکرېټ ګوند په اوږو وي".

هغه وویل: دوي له پکار وه چې د صدر ټرمپ لخوا شوي لوظنامه باندې عمل وکړي. دوي هغه شان وه نه کړه او په بله لار روان شو او افغانستان یې طالبانو ته حواله کړو. او داسې کوم شرط یې هم ورته کښې نه ښودلو کوم چې د صدر ټرمپ په تیره دوره کې شوي لوظنامه کې اېښودل شوي وو".

ښاغلي وویل، " مخکې چې څه کیږي، مونږ به ګورو او بیا به فیصله کوو".