لاس رسیدونکی لینک

 
د تورخم لارې پرانستو لپاره په پوله د دواړو خواو ګډه جرګه اؤ لواړګي کې احتجاج شوی
تازه خبر

د تورخم لارې پرانستو لپاره په پوله د دواړو خواو ګډه جرګه اؤ لواړګي کې احتجاج شوی


File Photo
File Photo

د افغانستان اؤ پاکستان تر منځ د تجارتي لارې تورخم د خلاصولو لپاره، د پاکستان او افغانستان دواړو خواوو د مشرانو، سوداګرو او مدني فعالانو په ګډون، نن د صفري نقطې پر سر د جرګې تابیا شوې ده.

دا جرګه د دواړو غاړو ترمنځ د رامنځته شوي تاوتریخوالي د حل لپاره رابلل شوې، ترڅو د خبرو له لارې شخړه هواره او دروازه پرانیستل شي.

په عین حال کې د تورخم لارې د بندېدو پر ضد، د خیبر لواړګي سیمې سیاسي فعالانو، سوداګرو او د مدني ټولنې غړو د امن لاریون کړی او د دواړو هېوادونو له واکمنو یې غوښتنه کړې، چې دا لاره ژر تر ژره د ولس د تګ راتګ او سوداګرۍ لپاره پرانیزي.

د لاریون په مهال د خواري کښو د اتحادیې پخواني مشر فرمان خان وي او اې ډيوه ته ویلي "زموږ روزګار په ټپه ولاړ دی. د روژې میاشتې نه ۱۰ ورځې مخکې دا پوله بنده شوه. موږ فکر کاوه چې د روژې له راتګ وړاندې به مزدوري وکړو، خو نه یوازې دا چې دروازه بنده پاتې شوه، بلکې جګړه هم وشوه، چې زموږ ستونزې یې نورې هم ډېرې کړې. اوس موږ بې‌روزګاره یو، کاروبار مو بند دی، او ماشومان مو په مشکله ساتو."

د تورخم دروازه د فبرورۍ له وړومبۍ نېټې راهیسې بنده ده. د پاکستان سرحدي ځواکونو دعوه کړې، چې افغان طالبانو د ممنوعه سیمې دننه پوسته یا ودانۍ جوړول غوښته ، چې له امله تاؤ تریخوالی رامنځته شو اؤ لاره وتړل شوه.

د پښتون ژغورنې غورځنګ د خېبر کوارډینیټر آفتاب شینواري د مظاهرې پر مهال وویل"د لارې بندېدو نه یوازې عام خلک متاثره کړي، بلکې د تجارت پر بهیر یې هم بد اثر اچولی دی. که موټر چلوونکي دي، که خواري کښ دي، که د کسټم کلیئرنس ایجنټان دي، که دوکانداران دي، که بټۍ لرونکي – ټول زیانمن شوي دي"

د هغه وینا وه چې د سیمې ۸۰ سلنه خلک د تورخم له لارې سره تړلي دي، خو اوس د هغوی روزګارونه بند دي.

د تورخم لارې د تړل کېدو له امله دواړو غاړو ته په زرګونو مال‌ وړونکي ګاډي بند پاتې دي چې د سوداګرو لپاره یې جدي ستونزې پیدا کړې دي اؤ ددې تر څنګ ګڼ شمیر مسافر او ناروغان هم په دغه لاره د اوښتو په تمه دي

د تحصیل چیرمین شاه خالد وویل"جګړه د هېڅ ستونزې حل نه دی. دواړه حکومتونه باید دا مسئله د خبرو له لارې حل کړي. موږ د افغانستان له ولسه هم تمه لرو، چې خپل غږ پورته کړي او پرامنه مظاهره وکړي، لکه څنګه چې موږ دلته د خپل حق لپاره راوتلي یو."

سوداګرو او اقتصادپوهانو خبرداری ورکړی، چې د افغانستان سره د شریکې پولې پر سر پرله‌پسې نښتې، د دواړو هېوادونو ترمنځ تجارت ته سخت زیان رسولی شي.

د دوی په وینا، که دا وضعیت همداسې دوام ومومي، نو له افغانستان سره به د 700 میلیونه ډالرو سوداګرۍ، او له مرکزي اسیا سره د 500 میلیونه ډالرو سوداګرۍ ته تاوان ورسېږي.

  • 16x9 Image

    فرید شینواری

    فرید شینواری د پښتونخوا د خیبر ضلعې اوسېدونکی او په پېښور کې د وي او اې ډیوه د خبریال په توګه کار کوي، چې د سیمې پر ټولنیزو، سیاسي او نورو موضوعاتو رپوټونه جوړوي. هغه له 2012م کال راهیسې له فرنټېر پوسټ انګرېزي ورځپاڼې سره کار کوي او له دې سره سره یې له بېلابېلو سیمه ییزو رېډيوګانو سره هم کار کړی دی.

Forum

هېلو وي او اې په ټي وي

هېلو وي او اې په ټي وي
please wait

No media source currently available

0:00 0:59:57 0:00

بي بي شیرینه

بي بي شیرینه – په ټیلې ویژن
please wait

No media source currently available

0:00 1:59:58 0:00

Recommended

XS
SM
MD
LG