پاکستان ناقانونه او افغان سیټزن کارډ لرونکو افغانانو ته د روانې میاشتې تر پايه هیواد نه د وتلو امر کړی

پاکستان پخپل ملک کې د میشتو ټولو ناقانونه بهرنیانو د ایستلو پرېکړه کړې اؤ د کورنیو چارو وزارت ټولو ناقانونه کسانو اؤ افغان سټیزن کارډ لرونکو ته د مارچ تر 31مې نېټې له پاکستانه د وتلو امر کړی دی.

د کورنیو چارو وزارت پخپل یو بیان کې ویلي دي چې د اپریل له وړومبۍ نېټې به ګرد هیواد څخه د ټولو ناقانونه بهرنیانو د شړلو عمل پېلولی شي.

د کډوالو او وطن ته د ستنېدونکو افغانانو د چارو دپاره د افغانستان د واکمنو طالبانو وزیر مولوي عبدالکبیر د زیارت، پنجشنبې، په ورځ د ایران او د پاکستان نه وغوښتل چې افغان کډوالو سره "له زغم او حوصلې څخه کار واخلي".

هغه له اسلام اباد اؤ تهرانه غوښتي وؤ چې د افغانستان د اقتصادي صورتحال په سوب دې کډوال په جبر نه ستنوي او نور وخت دې ورکړي خو پاکستان اؤ ایران لا د لوړ پوړي طالب چارواکي دې غوښتنې ته څه ځواب نه دی ویلی.

ډان نیوز د کورنیو چارو د وزارت له خولې ویلي دي چې د هیواده ایستل کېدونکو کډوالو لپاره د خوراک اؤ روغتیایي اسانیو تابیا نیول شوې ده.

تر دې وړاندې د تېرې څه مودې راهسې مطبوعاتو کې داسې رپورټونه مخې ته راتلل چې حکومت د پاکستان د اسلام اباد اؤ راولپنډۍ ښارونو څخه د افغان کډوالو د ایستلو له په خاموشۍ سره پېل کړې اؤ د هغوي افغانستان ته د ستنولو پلان هم تیار کړل شوی دی.

پاکستان په کال 2023 کې په ملک کې امنیت د ښه کولو په خبره نه د غېرقانوني غېر ملکیانو د وېستلو دپاره اقدامات شروع کړل او د کډوالو دپاره د ملګرو ملتونو ادارې یو اېن اېچ سي ار د شمېرو ترمخه د 2023 راهسې 825000 افغانان د پاکستان نه خپل وطن ته ستانه شوي دي. تر 40000 پورې افغانان پاکستان ډیپورټ یا ملک بدر کړي دي.

د جنورۍ په میاشت کې پاکستان قریباً درې مېلین افغانان د ستنولو دپاره یو مرحله وار پروګرام اعلان کړو چې ترمخه به په پاکستان کې په قانوني او غېر قانوني توګه مېشته کډوال او هغه افغانستان د ملک نه وباسي چې د امریکې په شمول په نورو ملکونو کې د ابادېدو په انتظار په پاکستان کې دي.

د پاکستان د مجوزه تګلارې ترمخه قانوني او غېر قانوني افغانستان به په وړمبۍ مرحله کې ستنولی شي.

هغه افغانان چې په نورو ملکونو کې د ابادېدو په انتظار په پاکستان کې دي د مارچ تر 31 نېټې پورې د اسلام اباد څخه ویستل کېږي.

د تېر کال د جولای په میاشت کې پاکستان د افغانستان کډوالو دپاره د پي او ار کارډونو مېعاد د 2025 د جون تر دېرشمې نېټې وغځولو.

تېره میاشت د ملګرو ملتونو د کډوالو ادارې (يو اېن اېچ سي ار) او د مهاجرت نړیوال سازمان (آی او اېم) پاکستان کې د افغانانو د بې ځایه کولو په لړ کې په وروستیو پرمختګونو اندېښنه څرګنده وه.

دواړو ادارو د فرورۍ په پينځمه نېټه ګډه اعلاميه کې ويلي وو، د 2025 کال د جنورۍ د لومړۍ نېټې راهسې، د اسلام آباد او راولپنډۍ کې د افغانانو نيول زيات شوي، چې پکې قانوني اسناد لرونکي هم شامل دي.

سږ کال تراوسه پورې يواځې د اسلام اباد او پېنډۍ څخه د 800 نه زیات افغانان چې ښځې او ماشومان پکې شامل دي، بيرته خپل هيواد ته شړل شوي، او دغه عمل په افغان کډوالو کې نوره ويره سېوا کړې ده.