پاکستان وايي، د صدر ټرمپ دا اعلان ستايي چې افغانستان کې پاتې شوې وسلې او سامانونه اوباسي

پاکستان وايي، د امریکې د صدر ډانلډ ټرمپ د دغه اعلان ستاينه کوي چې نوموړي ويلي، افغانستان کې د امریکې پاتې شوې وسلې او نور سامانونه اوباسي.

د پاکستان د بهرنيو چارو د وزارت ویاند شفقت علي خان نن په شپږم مارچ اوونيزه خبري غونډه کې دغه خبره وکړه او پاکستان کې د نيول شوي داعش ترهګر په اړه یې د امریکا د ملي امنيت د مشاور لخوا د پاکستان د بهرنيو چارو وزير سره د شوو ټيليفوني خبرو وويل، چې د امریکا صدر د پاکستان د ترهګرۍ ضد هڅې ستايلي دي.

نوموړي وويل، د بهرنيو چارو وزير اسحاق ډار ويلي، پاکستان به د ترهګرۍ ضد مبارزه کې د امریکا سره ملاتړ دوامداره ساتي، او د امریکايي صدر د افغانستان څخه وسلو او نورو سامانونو ويستلو د اعلان ستاينه یې وکړه.

صدر ټرمپ د فرورۍ په 26مه ويلي وو، د امریکا دفاع وزیر پیټ هګست ته یې دنده سپارلې چې له افغانستان څخه د امریکايي تجهیزاتو او وسلو د راستنولو په اړه ارزونه وکړي.

له ټرمپ څخه پوښتنه شوې وه، چې ایا د بګرام پوځي اډه به بيرته ونیسي، هغه په دې اړه له کوم مشخص ځواب پرته ويلي وو، " فکر کوم موږ باید تجهیزات بېرته ترلاسه کړو. پیټ ته مې ویلي دي چې دا موضوع وارزوي. موږ د میلیونونو، لسګونو میلیارد ډالرو په ارزښت نوې وسلې پرېښودې. تاسو ګورئ چې هغوی (طالبان) یې هرکال نندارې ته وړاندې کوي".

صدر ټرمپ د خپلې کابېنې په لومړۍ غونډې کې د یو خبریال د پوښتنې په ځواب کې ويلي وو، چې له افغانستان څخه د امریکايي سرتېرو له وتلو وروسته "777زره ټوپکونه او 70زره زغره وال موټرونه" د طالبانو لاسونو ته ورغلې دي. هغه ويلي وو، "فکر کوم دا باید بېرته ترلاسه کړو".

د امریکايي صدر څرګندونو په غبرګون کې د طالبانو د حکومت ویاند ذبیح الله مجاهد وو، طالبانو دا وسلې په غنیمت کې نیولې او اوس یې د خپل هیواد د دفاع لپاره کاروي.

مجاهد د مارچ په دويمه د طالبانو تر کنټرول لاندې ملي تلویزیون سره په مرکه کې هیله ښودلې چې د هغه سلاکاران به د دغو وسلو په باب صدر ټرمپ ته سم او دقیق معلومات ورکړي.

خو ويلي یې وو، "هغه وسلې نیول شوي دي، هغه تیرې ادارې ته د دوی ترلاس لاندې ورکړل شوې وې، اسلامي امارت [طالبانو حکومت] په غنیمت نیولې او مونږ د دغو وسلو په مټ د هیواد ساتنه کوو".

پاکستان د صدر ټرمپ د افغانستان څخه د وسلو ايستلو د اعلان هرکلی په داسې وخت کې کړی چې، د جنورۍ په مياشت کې د پاکستان د بهرنیو چارو وزارت په افغانستان کې د امریکا د پوځ پر پاتې شویو پوځي وسایلو او تجهیزاتو باندې اندیښنه ښودلې او ویلي یې وو، د دغو پوځي سامان الاتو شتون د پاکستان د امنیت او خلکو لپاره یو جدي ګواښ دی.

شفقت علي خان په 29مه جنورۍ یوه خبرپاڼه کې ویلي وو، چې له افغانستان څخه د امریکايي ځواکونو د وتلو او پر دغه هیواد باندې د طالبانو د بیا واکمنیدو وروسته د تحریک طالبان پاکستان " ټي ټي پي" د ډلې په ګډون ترهګرې ډلې د دغو پوځي وسایلو څخه په ترهګرو بریدونو کې کار اخلي.

د پاکستان پوځ او حکومت دعوه کوي، د کله نه په افغانستان کې طالبان په واک کې راغلي، پاکستان کې ناامني او ترهګري سېوا شوې ده، او د افغانستان د خاورې نه پاکستان کې ترهګري کيږي، خو طالبانو د پاکستان دغه دعوې او تورونه تل رد کړي او ويلي یې دي پاکستان دې د خپلو ناکامو زمه واري په دوی نه ور اچوي.