د خېبرپښتونخوا په بنو ښار کې دوو ځانمرګي حمله کوونکو د نهې، سه شنبې، په ماښام د پوځ په مرکز یا چاوڼۍ حمله وکړه چې په کې لږ تر لږه نهه کسان وژل شوي او ۲۵ نور کستان زخمیان شوي دي. د وسله والو حافظ ګل بهادر نومې ډلې د حملې ذمه واري په غاړه واخیستله.
د امنیتي ادارې یو چارواکي وي او ای ډیوه ته وویل شپږ وسله وال هم د ځواکونو په جوابي ډزو کې وژل شوي دي.
د چارواکو په قول حمله کوونکو په دوو ځانمرګي چاودونو د چاوڼۍ دېوال مات کړو او نورو وسله والو پوځي مرکز ته د ور ننوتلو کوښښ کولو خو امنیتي ځواکونو په جوابي ډزو په شا وتمبول.
د بنو د لوی هسپتال، اېم ټي ايي، ترجمان نعمان خان وي او ای ډیوه د نهه کسانو د وژل کېدو او د ۲۰ کسانو د زخمي کېدو تصدیق وکړو. هغه وویل وژل شوي او زخمیان د ښځو او ماشومانو په شمول ټول ملکي خلک دي.
پوځ په سمدستي ډول په حمله کې د مرګ ژوبلې په اړه څه نه دي ویلي خو د بنو ډسټرکټ هسپتال وویل په وژل شویو کسانو کې څلور ماشومان هم وو چې کورونه یې د پوځي چاوڼۍ سره نږدې وو.
حافظ ګل بهادر ډلې د حملې ذمه واري ومنله او ويې ويل د امنیتي ځواکونو په لسګونو عسکر يې وژلي دي.
د ای اېف پي خبري ادارې ترمخه، حافظ ګل بهادر ډلې وویل وسله والو يې اهم هدف ته لاس رسی وکړو او قابو يې کړو.
د ای اېف پي ترمخه، حافظ ګل بهادر ډلې د امریکې په مشرۍ کې د نېټو ځواکونو خلاف په افغانستان کې د افغان طالبانو ملاتړ کړی و.
د بنو په پېښه کې د مرګ ژوبلې د رپورټونو نه مخکې د بنو ځینو اوسېدونکو وي او ای ډیوه ته ویلي وووړمبی يې دوه درنې چاودنې واورېدلې او وروسته ډزې شروع شوې.
پولیس وویل مشکوک حمله کوونکي د عادل کلي د طرف نه د چاوڼۍ دېوال سره د بارودو نه ډک موټر ټکر کړو او بیا وسله والو پوځي مرکز ته د وننوتلو کوښښ کولو چې د ډزو تبادله شروع شوه.
پولیس وویل نور معلومات به پوځ شریکوي.
ويل کېږي چې چاودنې دومره زورورې وې چې په نږدې کورونو کې يې ښېښو، کړکیو او بامونو ته نقصان ورسوولو.
په بنو کې د پوځ په مرکز د دې نه مخکې هم حمله شوې ده.
یادونه: د دې رپورټ ځینې معلومات د ای پي او د ای اېف پي خبري ادارې نه هم اخیستل شوي دي
Forum