د خېبر پښتونخوا د ناکراره قبایلي ضلعې کورمې په پګن، اوچت، مندوري او دکمر سیمو کې د خېبر پښتونخوا حکومت د پرېکړې سره سم د وسله والو په ضد د لټونې عمليات پېل شوي دي.
په کورمه کې روان عمليات ورورسته له هغې پېل شوي چې د فبرورى په 17مه نامالومه وسله والو په مندوري او اوچت سيمو کې پاړاچنار ته تلونکې د مرستې د ګاډو په قافله بريد وکړو او په کې يې د 05 امنيتي عسکرو په شمول 06 کسان وژلي وو.
په دې برید کې 15 نور کسان ژوبل شوي هم وؤ چې پکې څلور د امنيتي ځواک سرتېري هم شامل وو.
د کورمې د مندوري او اوچت سيمو خلک وايي پوځيانو او اېف سي عسکرو نن د جمعې په ورځ په سیمه کې د لټونې عمليات پېل کړي او کور په کور ګرځي، وسلې راغونډوي او شکمن خلک اوچتوي.
د يادې سيمې يو تن نوروز خان وي او اې ډيوه ته ويلي که حکومت د ترهګرو په ضد عمليات کوي نو ودې کړي خو دغه عمليات څو وارې مخکې هم شوي دي او هيڅ نتيجه يې نه ده ورکړې.
هغه وايي امنیتي ځواکونه دې د ترهګرو په ترڅ کې عام ولس نه ځوروي او نه دې کډه کولو باندې مجبوره کوي ولې چې مونږ په هيڅ صورت کې کډه کولو ته تيار نه يو.
د خېبر پښتونخوا صوبې وزیر اعلا علي آمين ګنډاپور د چهارشنبې به ورځ پېښور کې خبريالانو ته ويلي وؤ په کورمه کې شخړه د ځمکو په سر نه ده بلکې په دې کې بهرني قوتونه لاس لري او هغوى دلته فرقه ييزو نښتو له هوا ورکوي او وسلې رالېږي خو نوموړي نه وه واضحه کړې چې دغه بهرنیو قوتونو نه مطلب څوک دي؟
بل پلو د برنى کورمې پاړاچنار کې د شيعه ټولنې مشرانو په امدادي قافله باندې له بريد وروسته ويلي دا اولسم ځل شو چې د شوې لوظنامې نه سرغړونې کېږي او دې نه پس دوي د هيڅ يوې حکومتي جرګې سره تر هغه وخته نه کښیني ترڅو چې د وسله والو په ضد سخت ګامونه وانه خستل شي او د ټل پاړاچنار لاره د خلکو په مخ خوندى نه کړى شي.
اوړمه ورځ امنیتي چارواکو ویلي وؤ د خیبر پښتونخوا د ناکراه قبایلي ضلعې کورمې په اوچت نومې سیمه کې په امدادي قافله شوي برید کې د لاس لرنې په تور 11 وسلوال نیول شوي دي.
تر دې وړاندې، صوبايي حکومت د کورمې په پېښه کې د ښکېلو وسلوالو د سرونو بیې ټاکلې وې، چې ویل کېږي دوی د بګن، وتیزۍ او هارون مېله سیمو سره تړاو لري.
په کورمه کې د 14 وسلوالو د سرونه قیمتونه ټاکل شوي، چې تر ټولو لوړ قیمت پکې د کاظم نومې وسله وال کماندر د سر درې کروړه روپۍ ټاکل شوی دی.
د حکومتي اعلامیې له مخې د امجد الله د سر قیمت ده کروړه، د مکرم خان یو نیم کروړ، د درویش وزیر یو کروړه، او د منصور، اسامه، آدم ساز، یاسین او وزیر محمود د سرونو بیعې 30 لکه روپۍ ټاکل شوې دي.
همداراز، د سیف الله، اسامه عرف شفیق، او نور الله د سرونو بیعې ، یو،یو کروړ اؤ د عثمان د سر قیمت 80 لکه روپۍ ټاکل شوی دی.
د روانې اونۍ په پېل کې د خیبر پښتونخوا حکومت پرېکړه کړې وه چې کورمه کې د ناامنۍ د مخنیوي لپاره، د اوچت، مندوري، داد کمر، او بګن کلي له خلکو خالي کړي او د وسلوالو پر ضد پراخه عملیات پیل کړي.
همداراز، حکومت پرېکړه کړې وه چې د کرم په ناامنۍ کې د لاس لرونکو کسانو نومونه به "فورتھ شیډول" ته واچوي.
حکومت ويلي، د لومړۍ جنورۍ د امن معاهدې باوجود ځینې عناصر شر جوړوي، او د هغې له امله رياست ته خواست شوی چې د امن دښمنانو ضد سخت ترينه کارروايي وکړي او خلک نور د مشکل سره مخ نه شي.
صوبايي حکومت د وړاندې نه ویلي، په کورمه کې د بنکرو او مورچو ورانولو عمل دوام لري.
د کورمې د شخړې هواري لپاره د جنورۍ په وړومبۍ نېټه کوهاټ کې د حکومت په مرسته شوې جرګه کې دواړو ټولنو د امن تړون لاسليک کړی و.
خو د دغې لوظنامې لاسليک کېدو وروسته هم په کورمه کې نه وسله راغونډه کړل شوې او نه د څلورو میاشتو راهسې بنده د ټل۔پاراچنار لاره په مکمله توګه پرانستل شوې ده.
د جنورۍ په 31مه په کوهاټ کې د حکومت په مرسته دواړو فريقينو ترمنځ جرګه شوې وه چې پکې د شوې لوظنامې څوارلس نکاتو عملي کولو په لړ کې دواړو خواو حکومت ته د کمېټيانو جوړولو لپاره د څوارلسو، څوارلسو تنانو نومونه ورکړي وو.
د فرورۍ په درېيمه نیټه پېښور کې د شيعه او سني ټولنو د مشرانو ترمنځ د ټل۔پاړاچنار لارې د پرانستلو، وسلې غورځولو او په سيمه کې پاتې مورچو ړنګولو په هکله جرګه شوې وه
Forum